אין די יעצטיגע טעג האט זיך אנגעהויבן די מאסיווע קאנסטרוקציע ארבעט אויפצובויען די נייע גרויסע בית המדרש פאר חסידי באבוב 45 אין לאנדאן, נאך לענגערע יארן פון פלאנירונגען, און נאך וואס די קהילה האט זיך לעצטנס ארויסגעצויגן צו א צייטווייליגע לאקאציע, ביז די נייע בית המדרש וועט זיין פארטיג.
די שטח הבניה ביים ווינקל פון קלעפטאן קאממאן און ברעידאן ראוד, וואו די קהילה קדושה איז שוין איינקוואטירט פאר א שיינע פאר יאר, איז פארלאפענע וואך פארוואנדלט געווארן אין א בערגל ברוכווארג, ווען מיט גרויסע מאשינען האט מען צוזאמגעווארפן די אלטע געביידע, דארט וואו די בית המדרש איז געווען סטאנציאנירט פאר צוועלף יאר, אינעם קליינעם בית המדרש וואו די חסידים האבן זיך צונויפגעשטופט מדי יום ביומו ומדי שבת בשבתו.
מיט א האלבע יאר צוריק איז אדורכגעפירט געווארן א מאסיווע קאמפיין אויפצוטרייבן די נויטיגע סכומים צו קענען פאראויסגיין מיט די גרויסע פלענער, און אצינד האט מען אין א מזל'דיגע שעה זוכה געווען צו זעהן די סתירה על מנת לבנות, ווען מ'גרייט שוין צו דעם גאנצן שטח אנצוהייבן מיט די עבודת הבניה, מיטן האפענונג צו זעהן די בית המדרש גרייט עומד על תילו ביז דריי יאר פון יעצט.
די נייע בית המדרש וועט ארייננעמען א לופטיגע היכל בית המדרש מיט הונדערטער זיץ פלעצער, א ווייבער שוהל און דריי שטיבלעך צום דאווענען, א היכל התורה און אוצר הספרים, א פראכטפולע מקוה, אפיסעס פאר די הנהלת הקהילה און א שמחה זאל, און נאך פארשידענע איינריכטונגען לטובת הציבור ולרווחת המתפללים.
