שטייענדיג געציילטע טעג איידער די יומא דהילולא קדישא פון פונעם מופת הדור והדרו הרה"ק רבי ישעי'לע פון קערעסטיר זי"ע, איז געמאלדן געווארן אז עס איז אוועקגעשטעלט געווארן א נייע וועד רבני עיר קערעסטיר, וואס באשטייט פון א געקליבענע צאל אדמורי"ם ורבנים, אייניקלעך פון הרה"ק רבי ישעי'לע זי"ע, וועלכע וועלן שטיין אין שפיץ פון אלע אקטיוויטעטן אשר בארץ המה, און באגלייטן די וואוילטעטיגע פעולות דורכאויס די גאנצע יאר.
דאס קומט נאכדעם וואס אין די לעצטערע יארן איז דראסטיש געשטיגן די צאל מתפללים אין קערעסטיר, ווען שווערע הונדערטער טויזענטער אידן דרייען זיך דורך דעם הייליגן שטאט קערעסטיר אין אונגארן דורכאויס די גאנצע יאר, און די מאסיווע אפעראציע צוצושטעלן אלע באדערפענישן פאר די מתפללים ביים ציון הק' ווערט מער און מער קאמערציאל, אזש עס פארלאנגט זיך א פולשטענדיגע וועד הרבנים וואס זאלן זיך אפגעבן מיט אלע רוחניות'דיגע אנגעלעגנהייטן און עניני כשרות והמסתעף.
די וועד רבני עיר קערעסטיר באשטייט פון עטליכע אדמורי"ם אייניקלעך פון רבי ישעי'לע, כ"ק האחים האדמורי"ם מקאסאן און פארשעי, אבד"ק טשאקאווא קערעסטיר, אבד"ק סאטמאר מאנסי, אבד"ק אודווארי, אבד"ק קערעסטיר וויליאמסבורג, און נאך עטליכע רבנים ועסקנים וועלכע שטייען אין שפיץ פון די פילצאליגע אקטיוויטעטן אין קערעסטיר.
