מיט בלויז צוויי טעג פארבליבן גרייטן זיך הונדערטער אידן חסידים ואנשי מעשה צו מיטהאלטן א היסטארישע שבת, שבת קודש "מקדש מלך" בצל הקודש פון כ"ק אדמו"ר מבאבוב 45 שליט"א, אינאיינעם מיט הונדערטער חסידים נגידים ותומכים, עמודי התווך פונעם קרן הבנין, אויפצובויען די נייע גיגאנטישע ביהמ"ד מרכז העולמי דחסידי באבוב 45 אין בארא פארק.
די ערשטע פלענער איבער די היסטארישע שבת איז פראקלאמירט געווארן מיט עטליכע חדשים צוריק, ביים גרויסארטיגן מגבית לכונן את בית חיינו, וואו די חסידים האבן אריינגעברענגט פאנטאסטישע סכומים קרוב צו צוועלעף מיליאן דאללער, צו פאראויסרוקן די היסטארישע בוי פראיעקט אין צענטער פון שטאט בארא פארק.
אצינד ווען מ'האלט ווייניגער ווי אכט און פערציג שעה צום אנהייב פון די היסטארישע ועידה, גרייטן זיך די העכער פינף הונדערט חסידים וואס האבן שוין רעזערווירט זייער זכות צו מיטהאלטן דעם שבת, ארויסצופארן פרייטאג מיטאג צייט צום פראכטפולן ארמון האטעל אין קאנעקטיקוט, וואו עס איז ערווארטעט א זעלטן רייכע פראגראם. צווישן אנדערע וועט פרייטאג נאכמיטאג פארקומען אינעם ריזן זאל אין האטעל א נאסטאלגישע "באבוב רינעק", וואו עס וועט ווערן אויפגעשפילט גייסטרייכע און היסטארישע מאמענטן פון שטאט באבוב אינדערהיים, מיט רייכע אינפארמאציע באגלייט מיט תוכנ'פולע דרשות, און א נארהאפטיגע געשמאקע טועמיה לכבוד שבת קודש.
אלס נואם הכבוד דורכאויס דעם געהויבענעם שבת, וועט קומען צו פארן דער חשובער גאסט פון לאנדאן הרה"ג ר' פנחס שנעעבאלג שליט"א ראש ישיבת וויזניץ לאנדאן, ביים מעמד "טלית לייגן" ערב שבת פארן זמן, וועט דער רבי שליט"א פארלערנען א שיעור אין חסידות, און פארטיילן א מזכרת פאר די חשובע משתתפים, די ספר הק' נועם אלימלך, אין וואס דער רבי לערנט דערין יעדן ערב שבת.
