ווי באריכטעט נעכטן איז כ"ק אדמו"ר מפאריסוב שליט"א אריינגעפירט געווארן אין שפיטאל אין א שווערע מצב, וואו לויט די אנווייזונגען פון די דאקטוירים האט מען באהאפטן דעם רבי'ן צו א רעספערעיטאר.
היינט נאכמיטאג אין ארץ ישראל איז פארגעקומען א גרויסע עצרת תפילה והתעוררות אין ביהמ"ד פאריסוב אין ירושלים, וואו מען האט אינאיינעם מתפלל געווען לרפואתו השלימה פונעם רבי'ן. צווישן אנדערע האט זיך אנגעזעהן דעם רבינ'ס ברודער כ"ק אדמו"ר מקאלושין שליט"א, דעם רבינ'ס איידעם כ"ק אדמו"ר מקרעטשניף קרית גת שליט"א, הגאון ר' נפתלי נוסבוים שליט"א ראש ישיבת חיי משה, און הגאון ר' יצחק משה ערלאנגער שליט"א.
אזוי אויך איז פארגעקומען א ספעציעלע עצרת תפלה ותחנונים אין ביהמ"ד משכנות הרועים אין ירושלים, בית מדרשו פונעם רבינ'ס פאטער הגה"צ ר' בנימין ראבינאוויטש זצ"ל מייסד קהילת משכנות הרועים, אין שפיץ פון אחיו הגדול פון רבי'ן כ"ק אדמו"ר ממשכנות הרועים שליט"א.
