מיט אומבאשרייבליכע פרייד און התרגשות האבן אלפי חסידי סקווירא אויפגענומען די בשורה טובה מטעם וועד הקמת הבית וואס פארפיגן אויף די מאסיווע בוי ארבעט אהערצושטעלן דעם נייען בנין בית המדרש הגדול אין שיכון סקווירא, אז אויף דעם קומענדיגן יו"ט שמחת תורה הבעל"ט וועט מען שוין אין א מזל'דיגע שעה באנייען דעם ריזן היכל ברוב עם הדרת מלך, אין שפיץ פונעם מנהיג העדה כ"ק אדמו"ר מסקווירא שליט"א.
די פרייליכע נייעס איז געמאלדן געווארן אין ראם פון די גליון "הקמת הבית" וואס איז ערשינען לקראת יו"ט שבועות, וואס האט ארויפגעברענגט די שמחת יום טוב און שמחת התורה ביז צום מאקסימום, מיטן האפענונג אז ביז געציילטע חדשים וועט מען שוין קענען פראווענען די יום טוב שמחת תורה צווישן די פיר ווענט פון די נייע שוהל.
העפטיגע בוי ארבעט גייט אן אין פולן קראפט צו פארענדיגן די היכל בית המדרש בעפאר די ימים טובים, איידער די יו"ט שמחת תורה ווען דער רבי שליט"א וועט פראווענען די געהויבענע הקפות אינעם נייעם היכל, אין באגלייטונג פון טויזענטער חסידים, וואס ווי באקאנט איז שמחת תורה דער גרעסטער צוזאמפאר פון איבער די גאנצע וועלט, ווען די טויזענטער חסידים קומען מיטהאלטן דעם רבינ'ס הקפות.
אין די זעלבע צייט פרובירן די עסקנים וואס מעגליך צו פארענדיגן דעם היכל מ'זאל עס אויך קענען נוצן אויף די תפילות ימים הנוראים, א זאך אויף וואס אלע חסידים קוקן ארויס, אבער דאס איז נאכנישט זיכער, וויבאלד כדי מ'זאל קענען דאווענען דארט דארף די היכל זיין פיל מער פארענדיגט מ'זאל קענען מיטהאלטן דאס דאווענען, אנדערש ווי די הקפות שמחת תורה וואס מוז נישט ווערן געפראוועט אין א פולקאם פארמאכטע היכל.
