מיט גרויס צער ווערט אצינד אויפגענומען די שווערע נייעס איבער די פטירה פון הרב החסיד ר' מרדכי שלמה שפיהרער ע"ה, זיבן און זעכציג יאר אלט פון בארא פארק, וועלכער איז ליידער קריטיש פארוואונדעט געווארן אין א שווערע עקסידענט פארלאפענעם מאנטאג ביינאכט אין צענטער פון די היימישע געגנט אין בארא פארק.
די עקסידענט האט פאסירט ביים ווינקל פון די פיר און פופציגסטע סטריט און די פופצנטע עוועניו, ווען הרב החסיד ר' מרדכי שלמה האט שפאצירט נעבן די גאס, און איז אראפגעקלאפט געווארן דורך א נישט אידישע דרייווער וועלכער איז אנטלאפן פון די סצענע, און שפעטער געכאפט און ארעסטירט געווארן דורך די פאליציי.
די לעצטע פאר טעג האט ער זיך זייער געמוטשעט אין א קריטישע צושטאנד, און היינט מיטאג צייט איז ער נפטר געווארן לחיי העולם הבא. די לוויה וועט פארקומען היינט נאכמיטאג ביי ביהמ"ד ביקאווסק אין בארא פארק, וואו דער חשובער נפטר האט פאר לאנגע יארן משמש געווען אלס גבאי נאמן אין ביהמ"ד.
