מיט די ריכטיגע כבוד התורה האבן צענדליגע טויזענטער אידן געהאט די זכיה צו מקבל זיין את פני קדשם פון די גדולי הדור, מרנן ורבנן גדולי תורה וואס זענען געקומען צו פארן פון ארץ הקודש צו אויפטרייבן גרויסע געלטער און אוועקצושטעלן א יסוד איתן פאר די נייע קרן עולם התורה, ראשי ישיבת סלאבאדקע, כ"ק אדמו"ר מראחמיסטריווקא, און הגאון רבי יעקב הלל שליט"א ראש ישיבת אהבת שלום.
א זעלטן היסטארישע מעמד קבלת פנים איז פארגעקומען זונטאג אויפדערנאכט ברחובה של עיר במעמד אלפי ישראל, ווען טראץ די שווערע וועטער זענען טויזענטער אידן ארויסגעקומען צו צייגן די כבוד התורה מיטן פולסטן שעצונג, אויף א גרויסע בימת הכבוד זענען געזעסן אויסגע'שורה'ט די חשובע געסט, און צענדליגע ראשי ישיבות און רבנים לענגאויס ניו יארק און ניו דזשערזי.
באגלייט מיט לעבעדיגע מוזיק און געזאנג האט מען מקבל געווען די חשובע געסט מיט פרייליכע לידער, דערנאך האט מען געהערט דעם דבר השם ברמה פון די גדולי הדור, ראשי ישיבת סלאבאדקע, ראשי ישיבת בית מדרש גבוה, הגאון רבי דן סגל, הגאון רבי יעקב הלל און הגאון רבי אברהם סאלים, און צום שלוס האט כ"ק אדמו"ר מראחמיסטריווקא שליט"א פארגעזאגט קבלת עול מלכות שמים מיט גרויס התעוררות.
מאנטאג נאכמיטאג איז פארגעקומען א גרויסע עלעגאנטע מסיבה אין איינער פון די הויכע ביזנעס געביידעס אין בעטערי פארק מאנהעטן, וואו די גדולי הדור זענען ערשינען אויפן איינלאדענונג פון א ליסטע פילאנטראפן תומכי תורה, צווישן זיי הנגיד ר' רפאל הערצקא, הנגיד ר' שמעון גליק, הנגיד ר' רובי שראון, די פילאנטראפן פון משפחת וואלף, קארפונקעל, וואלפסאן, און נאך באקאנטע גבירים אדירים.
ביים פראכטפולן באנקעט אין מאנהעטן, האט זיך אויך באטייליגט כ"ק אדמו"ר מוויזניץ שליט"א וועלכער איז צוגאסט אין ניו יארק, און האט באוויליגט צו זיין א טייל פון די היסטארישע כנסיה לשם שמים. אזוי אויך זענען געקומען צו פארן ספעציעלע שלוחים פון כ"ק אדמו"ר מגור שליט"א צו זיין א חלק פון די היסטארישע מסע הקודש מחזק צו זיין די עולם התורה.
היינט דינסטאג נאכמיטאג וועלן די גדולי הדור אפרייזן מיט א פריוואטע פליגער קיין טאראנטא אין קאנאדע, מזכה זיין די ארטיגע אידנטום און לעגענדארע פילאנטראפן צו זיין א טייל פון די היסטארישע מהפכה לחיזוק עולם התורה. א ריזן קבלת פנים וועט פארקומען פינף אזייגער נאכמיטאג אין די גרויסע בית יעקב זאל אויף סאראנעק באלערוואד במעמד אלפי ישראל.
