יעצט מיטאג צייט איז פארגעקומען אין מאנסי א היסטארישע אסיפה, וואו עס זענען זיך צוזאמגעקומען די נייע דיספעטשערס פון די מאנסי פייער דעפארטמענט, צו הערן דעם דעת תורה הברורה און קלארע הוראות פון די וועד הרבנים, וואס גיבט זיך אפ מיט די אנגעלעגנהייטן פון די מאנסי פייער דעפארטמענט.
די וועד הרבנים באשטייט פון דריי חשובע דיינים ומורי הוראה, הרה"ג ר' אברהם מנחם האגער שליט"א מו"ץ בבית הוראה וויזניץ, הרה"ג ר' שלמה גרינפעלד שליט"א דיין אין די בעלזא קהילה, און הרה"ג ר' הלל ראזענבערג שליט"א דיין אין די סאטמארע קהילה. והעומד על גביהם די חשובע רבנים אין שטאט, וואס פארפיגן אויף אלע שטאטישע אנגעלעגנהייטן.
די אסיפה איז צושטאנד געקומען אין ליכט פון די שפאגל נייע דיספעטשינג סיסטעם וואס איז נארוואס אריין אין קראפט דורך די פייער דעפארטמענט, נאכן אינוועסטירן איין און א האלב מיליאן דאללער צו אהערשטעלן א סאפיסקירטע סיסטעם ספעציעל פאר די היימישע אידנטום תושבי מאנסי והגלילות, ווען מ'קען גראד אריינרופן צו היימישע דיספעטשערס, אן דארפן דורכגיין די לאנגע ביוראקראטישע ליניע פון די 911 עמערדזשענסי סיסטעם, וואס האט שוין ביז היינט פאראורזאכט אסאך עגמת נפש און אידישע קרבנות.
די אסיפה איז פארגעקומען אין שפיץ פון דריי חשובע רבני העיר, הגה"צ ר' יעקב יוסף האגער שליט"א בן כ"ק אדמו"ר מוויזניץ שליט"א, הגה"צ ר' פנחס חיים גרינוואלד שליט"א אבד"ק פאפא, און הגה"צ ר' שמעון כ"ץ שליט"א דומ"ץ סאטמאר, אלע דריי רבנים האבן אויפגעטרעטן מיט ווערטער, און אזוי אויך אלע דריי דיינים וואס זענען פאקטיש ביים טיש מיט די דיספעטשערס.
עס איז אויסגעשמועסט געווארן פארשידענע ענינים אנבאלאנגט די דיספעטשינג ביום השבת, לויפן אויף קאולס ביום השבת און דאס גלייכן, די רבנים האבן אלע אייניג ארויסגעוויזן זייער גרייטקייט צו באגלייטן די דיספעטשערס און וואלאונטירן מיט סיי וועלכע שאלה בהלכה עס זאל זיך מאכן.
