הונדערטער אידן האבן זיך היינט צופרי פארזאמלט אין ביהמ"ד הגדול דקהל יטב לב ד'סאטמאר אויף ראדני סטריט אין וויליאמסבורג, אפצוגעבן דעם כבוד האחרון פאר האי גאון וצדיק תלמיד חכם מופלג, זקן ויושב בישיבה מגיד מישרים בתורה והוראה, הגה"צ ר' שמעי' גרינבוים זצ"ל בעל מח"ס סייעתא דשמיא.
בפקודת הקודש פון כ"ק אדמו"ר מסאטמאר שליט"א האט מען אריינגעברענגט די מיטה אינעם היכל ביהמ"ד הגדול, באותו מקום וואו דער גאון האט פאר לאנגע יארן מרביץ תורה געווען, פארגעלערנט קביעות'דיגע שיעורים מדי יום ביומו, און אריינגעשיינט אין אידישע הערצער תורה חסידות און יראת שמים.
שטייענדיג פארנט פון א חכם שמת, איז פארגעקומען הספדים טראץ ראש חודש, עס האבן מספיד געווען הגה"צ גאב"ד טענקא שליט"א, הגה"צ גאב"ד פריימאן שליט"א וראב"ד התאחדות הרבנים, הגה"צ ר' הערשיל היילפערין שליט"א דומ"ץ וויען ב"פ, הגה"צ ר' לייבוש פריעדמאן שליט"א דומ"ץ ביהמ"ד הגדול ד'סאטמאר, און די קינדער הרבנים הגאונים שליט"א.
דערנאך האבן מאסן אידן באגלייט די מיטה אראפ די גאס ביז די הייוועי, ארום איינס אזייגער איז די מיטה אנגעקומען ביים עקזיט פון די ניו יארק סטעיט טרואוועי נעבן מאנסי, וואו עס האבן ווידער באגלייט א גרויסע ציבור תושבי העיר, אין שפיץ פון כ"ק אדמו"ר מוויזניץ שליט"א פון מאנסי, און הגה"צ גאב"ד סאטמאר מאנסי שליט"א וועלכער האט אויפגעטרעטן מיט קורצע דברי הספד.
אין די יעצטיגע מינוטן קומט פאר די מסע הלוויה אין היכל ביהמ"ד הגדול אין די סאטמארע קאלאניע מחנה לפידות אין ווייט לעיק, וואו כ"ק אדמו"ר מסאטמאר שליט"א וועט אויפטרעטן מיט דברי הספד. שפעטער נאכמיטאג וועט פארקומען די לוויה אין ביהמ"ד הגדול דקהל יטב לב ד'סאטמאר אין קרית יואל, אויפן וועג צום בית החיים אין קרית יואל וואו ער וועט געברענגט ווערן למנוחת עולמים.
ביים מסע הלוויה אין וויליאמסבורג האבן זיך אנגעזעהן צווישן אנדערע כ"ק האדמורי"ם מוויזניץ פון וומס"ב, דינוב, בית חיים יהושע, קארלסבורג, זידטשויב חרדים, הורדענקא, חתנו הגה"צ אב"ד קראסנא, אב"ד זענטא, אב"ד איבראן, אב"ד טשענסקאוויץ, אב"ד ליפשא, אב"ד יאקע, אב"ד סאמבור, אב"ד ברעזנא, אב"ד קלעסאן, אב"ד תולדות אהרן וויליאמסבורג, און הרה"ג ר' מאיר שטערן שליט"א אב"ד גבעת שאול.
