א ציבור עצום חסידים ואנשי מעשה האבן איבערגעפולט די גיגאנטישע פארקינג לאט פארנט פון ביהמ"ד הגדול אין קרית יואל, אפצוגעבן דעם כבוד האחרון פאר האי גאון וצדיק חסידא ופרישא, מרא דכולא תלמודא, הגה"צ ר' שמעי' גרינבוים זצ"ל בעל מח"ס סייעתא דשמיא, מגדולי התלמידים ביי כ"ק אדמו"ר הרה"ק מסאטמאר זי"ע.
די מיטה איז אנגעקומען ארום האלב נאך פינף נאכמיטאג, די הספדים זענען פארגעקומען אויף די שטיגן פארנט פון ביהמ"ד הגדול, וואו עס האט זיך באטייליגט בראש המלווים כ"ק אדמו"ר מסאטמאר שליט"א. צוערשט האט מען געהערט דברי הספד דורך א לייוו הוקאפ, פון הגאון הגדול הישיש רבי אליקים שלעזינגער שליט"א ראש ישיבת הרמה לאנדאן, דערנאך האט מספיד געווען הגה"צ ר' געציל בערקאוויטש שליט"א דומ"ץ קרית יואל ובעל אגלי דבש, ידיד נעוריו פונעם גרויסן נפטר.
דאן האט מען געהערט דברי הספד פון הרב הגאון ר' יצחק אליעזר וואלדמאן שליט"א א חברותא, הרב הגאון ר' אהרן יוסף ראזענבוים שליט"א א איידעם, און דערנאך האט כ"ק אדמו"ר מסאטמאר שליט"א משמיע געווען דברי הספד בקול נהי ובכי, ארומרעדנדיג איבער די געוואלדיגע זכיה פונעם גאון מיטן פארשפרייטן תורה איבער די גאנצע וועלט. דערנאך האט מען געהערט דברי הספד דורכ'ן טעלעפאן מעיר הקודש ירושלים פון כ"ק פוסק הדור מרא דארעא קדישא שליט"א.
דערנאך האבן טויזענטער אידן באגלייט די מיטה צום בית עלמין אין קרית יואל, וואו דער גרויסער נפטר איז געקומען לקבורה אויפן חלקת הרבנים, גאר נאנט צום אוהל הק' פון מורו ורבו הרה"ק מסאטמאר זי"ע.
ביים מסע הלוויה אין קרית יואל האבן זיך באטייליגט די הונדערטער תלמידי הישיבות הקדושות דחסידי סאטמאר, וועלכע זענען געקומען בפקודת הקודש פון כ"ק אדמו"ר מסאטמאר שליט"א אפצוגעבן דעם כבוד האחרון פארן גרויסן גאון מאריות שבחבורה ומהיושבים ראשונה במלכות בית סאטמאר.
