מטעם בית כ"ק אדמו"ר מסאטמאר שליט"א איז באשטעטיגט געווארן אז דער רבי שליט"א וועט אונטערנעמען א מסע הקודש קיין אנטווערפן דעם קומענדיגן חודש כסלו, מיטן ציהל מחזק צו זיין קהל עדת צאן מרעיתו תושבי אנטווערפן, און באשיינען א רייע מעמדים פון הרחבת גבולי הקדושה אינערהאלב די קהילה און מוסדות סאטמאר אין אנטווערפן.
די מסע הקודש וועט פארקומען אין לויף פון די וואכן טעג פרשת וישלח, דער רבי וועט ארויספארן פון ניו יארק זונטאג אויפדערנאכט און אנקומען בשערי העיר מאנטאג אינדערפרי, און פארבלייבן אין שטאט ביז דאנערשטאג, ווען דורכאויס די געהויבענע ימי הביקור וועט פארקומען מערערע מסיבות און מאורעות סיי צו פייערן די הרחבת גבולי הקדושה, און סיי אויפצוטרייבן פרישע געלטער להחזקת הקהילה והמוסדות.
די הויכפונקט פון די ביקור המרומם וועט זיין די מעמד הנחת אבן הפינה פאר די נייע בנין ביהמ"ד הגדול והחדש דקהל יטב לב ד'סאטמאר אין שטאט, א מעמד חנוכת הבית פאר די נייע בנין התלמוד תורה וואס איז פארענדיגט געווארן כלול בהדרו, און אזוי אויך וועט דער רבי באשיינען די שמחת השבע ברכות במעונו פונעם דיין הקהילה הגה"צ ר' אלעזר פריעדמאן שליט"א, זון פון הגה"צ ר' ברוך אברהם פריעדמאן שליט"א דומ"ץ סאטמאר העריסאן, און איידעם ביי כ"ק אדמו"ר מפשעווארסק שליט"א.
די פריידיגע מעלדונג איבער די געהויבענע מסע הקודש איז געמאלדן געווארן נעכטן אויפדערנאכט, און אין די נאנטע טעג וועט פארקומען נאכאנאנדע אסיפות פון די עסקני הקהילה אויסצוארבעטן אלע פונקטליכע דעטאלן אויפן שענסטן און בעסטן פארנעם.
