דעם קומענדיגן מיטוואך ביינאכט וועט כ"ק אדמו"ר מוויזניץ שליט"א פון מאנסי זיך ארויסלאזן אויף א בליץ נסיעה קיין לאנדאן, צו באשיינען די שמחת החתונה בבית גיסו הגה"צ ר' משה מייזליש שליט"א אדמו"ר מליעזש ראדוואן, וועלכער איז אן איידעם ביים רבינ'ס שווער הגה"צ אבד"ק אוהעל זצ"ל. דער ליעזשער רבי מאכט חתונה א טאכטער, מיטן חתן א זון פון כ"ק אדמו"ר מביאלא בית שמש שליט"א.
דער רבי וועט זיך ארויסלאזן אין וועג מיטוואך ביינאכט כחצות הלילה, תיכף נאך די שמחת הבר מצוה פון צווילינג אור אייניקלעך ביים רבי'ן, קינדער ביי הרב ישראל אברהם טייטלבוים שליט"א זון פון הגה"צ אבד"ק נעפלעמיץ שליט"א, איידעם ביים רבינ'ס זון הגה"צ ר' דוד דוב האגער שליט"א. די מעמד הנחת תפילין קומט פאר מיטוואך צופרי אין וויזניצע ביהמ"ד אין מאנסי, און די סעודת הבר מצוה מיטוואך ביינאכט אין ספינקא זאל אין בארא פארק. נאכן בר מצוה וועט דער רבי ארויספארן פון בארא פארק צום לופטפעלד און זיך הייבן כחצות הלילה אונטערוועגנס קיין לאנדאן.
דער רבי איז ערווארטעט צו לאנדן אין די היטרו לופטפעלד אין לאנדאן דאנערשטאג מיטאג, און תיכף צופארן לבית האכסניא בבית הנגיד החסיד ר' שלום זושא פעלדמאן הי"ו אויף קלעפטאן קאממאן אין די סטעמפארד הילל געגנט, נאכמיטאג וועט דער רבי באשיינען די מעמד קבלת פנים און חופה ביים ליעזשער ביהמ"ד אויף קלעפטאן קאממאן, און שפעטער ביינאכט די שמחת החתונה אין זאל פון P&P.
אין די אווענט שעה'ן וועט דער רבי אנקומען אויף תפילת מעריב אין ביהמ"ד הגדול וויזניץ אין לאנדאן, אינאיינעם מיטן ברודער כ"ק אדמו"ר מוויזניץ שליט"א פון לאנדאן, נאך מעריב וועט פארקומען א מעמד קבלת פנים לכבודו, און דערנאך וועט זיין ספעציעלע שעות פאר די חסידים אריינצוגיין מיט קוויטלעך לקראת די ימים הנוראים הבאים עלינו לטובה.
פרייטאג פארטאגס וועט דער רבי זיך ארויסלאזן אויפן וועג צוריק קיין ניו יארק.
