נאך די ערשטע באריכט מיט צוויי וואכן צוריק, איבער די סדרי קבלת קהל אין די רעבישע הויפן אין בעפארברייטונג צו די הייליגע טעג, ברענגען מיר אצינד נאך א סעריע זמנים און באריכטן פון קבלת קהל בחצרות האדמורי"ם.
בעלזא
די קבלת קהל קומט פאר אזוי ווי די לעצטע פאר יאר, ווען דער רבי נעמט אויף גרויסע קבוצות פון הונדערטער חסידים אויפאמאל אין די גרויסע שטוב, און וואונטש יעדן צוזאמען בכלליות, איידער די חסידים גייען שנעל אריבער זיך וואונטשן פערזענליך.
דעם מוצאי שבת נאך הבדלה איז פארגעקומען די כוללות קוויטל פאר די טויזענטער בחורי הישיבות, דער בעלזא רב האט אויפגעטרעטן מיט דברי הדרכה לקראת די הייליגע טעג, און דערנאך זענען אלע בחורים אריבער בפני הקודש וואונטשן א גוט געבענטשט יאר.
*****
באיאן
פון רבינ'ס שטוב איז געמאלדן געווארן א ספעציעלע סדר פאר קבלת קהל, צוטיילט לויט די צענדליגע קלויזן פון חסידי באיאן פון איבער גאנץ ארץ ישראל, ווען צו יעדע באשטימטע צייט וועלן אריינקומען די חסידים מתפללים פון איין קלויז, איבערגעבן די קוויטלעך אינאיינעם, און דערנאך מקבל זיין ברכת הקודש.
זונטאג כי תצא איז געווען איינגעטיילט ספעציעלע שעות פאר פיר קלויזן, אנגעהויבן פון פינף דרייסיג נאכמיטאג, ווען יעדע קלויז האט באקומען א אייגענע האלבע שעה, צוערשט די חסידים פון ירושלים צווישן די יארגענג פון פופציג ביז זיבעציג, דערנאך די מתפללים פון קלויז תפארת מרדכי שלמה אין ביתר, די מתפללים פון קלויז היכל מרדכי שלמה אין ביתר, און די מתפללים פון קלויז תפארת מנחם אין ביתר.
דינסטאג כי תצא איז געווען איינגעטיילט אויפן זעלבן סדר פון פיר קלויזן, יעדע קלויז א האלבע שעה, אנגעהויבן מיט די חסידים פון ירושלים ביז די פופציג יאר, די חסידים פון בני ברק, די חסידים פון בית שמש, און די חסידים פון קרית גת. מיטוואך איז ווידער געווען די זעלבע סדר מיט פיר קלויזן פון ביתר, נחלת ישראל, נחלת יעקב, תפארת אהרן, און דעת משה.
נעכטן מאנטאג כי תבוא איז ווידער געווען דעם זעלבן סדר, דאסמאל צוטיילט פאר די יונגע אינגעלייט פון ירושלים, די חסידים פון מודיעין עילית, די חסידים פון עמנואל, און די חסידים פון אנדערע שטעט וואס זענען נישט געווען אריינגערעכנט אין די פריערדיגע קלויזן.
היינט דינסטאג כי תבוא איז די סדרי קבלת קהל געאייגנט פאר די זקני החסידים פון זיבעציג יאר און העכער.
*****
תולדות אהרן
א ספעציעלע סדר איז געמאלדן געווארן פאר קבלת קהל, ווען יעדע נאכט איז באשטימט פאר א אנדערע קבוצה חסידים, איינגעטיילט לויט די יארגענג אויף פונקטליכע יארן.
די סדר האט זיך אנגעהויבן זונטאג כי תצא מיט די צעירי האברכים, די וואס זענען געבוירן פון ראש חודש סיון תשס"ג און ווייטער, דערנאך איז געווען די רייע מיטוואך כי תצא פאר די אינגעלייט וואס זענען געבוירן פון ר"ח ניסן תשס"א ביזן פריערדיגן דאטום, א טאג דערויף די אינגעלייט וואס זענען געבוירן פון ר"ח אדר תש"ס ביזן פריערדיגן דאטום. זונטאג כי תבוא איז געווען די רייע פאר די אינגעלייט וואס זענען געבוירן פון ראש השנה תשנ"ז ביזן פריערדיגן דאטום, דינסטאג די וואס זענען געבוירן פון ר"ח תמוז תשנ"א, דאנערשטאג כי תבוא די וואס זענען געבוירן פון ר"ח סיון תשמ"ח, קומענדיגן זונטאג נצבים וילך די וואס זענען געבוירן פון ראש השנה תש"מ, דינסטאג די וואס זענען געבוירן פון ראש חודש ניסן תשכ"ז, און קומענדיגן מיטוואך נצבים וילך וועט זיין די רייע פאר די עלטערע אידן, וואס זענען געבוירן בעפאר ר"ח ניסן תשכ"ז.
פאר די חסידים אין בית שמש איז געווען אנדערע זמני קבלת קהל אין פינף באזונדערע טעג, איינגעטיילט לויט די געגנטער אין שטאט, די איינוואוינער פון רמה ד' און רמה ה' איינגעטיילט אין צוויי טעג, איין טאג די איינוואוינער פון גבעת ירושלים, איין טאג די איינוואוינער פון קרית הרמ"א, און נאך א טאג די איינוואוינער פון שכונת נחלה ומנוחה.
*****
סקווירא
דער רבי נעמט אויף יעדע נאכט בביתו נאוה קודש, מיט ספעציעלע טעג וואס איז געאייגענט פאר די חסידים פון אנדערע שטעט. יעדן מאנטאג איז געווידמעט די קבלת קהל פאר איינוואוינער אין סקווירא שטעטל, יעדן דינסטאג איז געווידמעט די קבלת קהל פאר די חסידים פון אנדערע שטעט, און מיטוואך נצבים וילך וועט זיין געאייגענט פאר די חסידים תושבי מאנסי.
אויסער דעם ווערט אפגעראכטן א גורל יעדן טאג, צווישן די חסידים וואס האבן זיך איינגעשריבן אריינצוגיין מיט א קוויטל יענעם טאג, ווער עס קומט פריער און ווער שפעטער, אזוי אז מען זאל נישט דארפן ווארטן צו לאנג אויפן ליניע.
*****
באבוב 45
דער רבי נעמט אויף יעדע נאכט אין די קוויטל שטוב בבנין בית המדרש, אויסער די פאלגענדע טעג ווען דער רבי נעמט אויף די חסידים אין אנדערע שטעט.
נעכטן מאנטאג כי תבוא איז דער רבי אנגעקומען קיין יוניאן אויף קבלת קהל, בבית חתנו הגה"צ ר' חיים ברוך האלבערשטאם שליט"א, מיטוואך פארט דער רבי קיין לעיקוואד אויף קבלת קהל, בבית הנגיד ר' חיים דוננער הי"ו. קומענדיגן מאנטאג נצבים וילך וועט דער רבי אויפנעמען די חסידים אין מאנסי, און מיטוואך נצבים וילך וועט דער רבי אויפנעמען אין וויליאמסבורג, אין שטוב פון הנגיד החסיד ר' יצחק אייזיק דייטש הי"ו ראש הקהל.
*****
וויען
דינסטאג נצבים וילך וועט דער רבי אויפנעמען די חסידים אין מאנסי, אין שטוב פון הנגיד החסיד ר' שמואל באדאנסקי הי"ו. מיטוואך נצבים וילך וועט דער רבי אויפנעמען די חסידים אין לעיקוואד, אין שפיץ פון הנגיד ר' חנני' שפיטץ הי"ו.
מאנטאג און דינסטאג עשרת ימי תשובה וועט דער רבי אויפנעמען די חסידים אין בארא פארק, אין שטוב פון הנגיד ר' אהרן הערש עלבויגן הי"ו. מיטוואך און דאנערשטאג עשרת ימי תשובה, און פרייטאג ערב יום הקדוש, וועט זיין קבלת קהל בביתו נאוה קודש פונעם רבי'ן אין וויליאמסבורג.
******
סאסוב
ווי יאר יערליך וועט כ"ק אדמו"ר מסאסוב שליט"א ארומפארן איבער די שטעט אין ארץ ישראל אויפצונעמען די חסידים מיט קוויטלעך לקראת די הייליגע טעג. אנגעהויבן פון קומענדיגע וואך פרשת נצבים וילך, ווען יעדע נאכט וועט דער רבי פראווענען די חסידים אין א אנדערע שטאט, זונטאג אין ביתר, מאנטאג אין ירושלים, דינסטאג אין בית שמש, מיטוואך אין ירושלים, און דאנערשטאג אין בני ברק.
מיטוואך אויפדערנאכט וועט דער רבי איבערגעבן א ספעציעלע שמועס הכנה לראש השנה בבית מדרשו אויף רחוב רש"י אין ירושלים.
******
וויזניץ מאנסי
כ"ק אדמו"ר מוויזניץ שליט"א פון מאנסי נעמט אויף בביתו נאוה קודש אין מאנסי יעדן טאג, עטליכע טעג איז דא ספעציעלע שעות געאייגענט פאר די רעבישע משפחות וואס גייען אריין אנשים נשים וטף. דורכאויס די וואך פרשת כי תבוא איז די קבלת קהל באגרעניצט, נאך וואס דער רבי נעמט אונטער א נסיעה קיין לאנדאן לכבוד א משפחה שמחה.
*****
וויזניץ קייאמישע
כ"ק אדמו"ר מוויזניץ שליט"א פון קייאמישע איז פארלאפענע וואך אנגעקומען אויף קבלת קהל אין מאנסי און בארא פארק, זונטאג האט דער רבי געפראוועט אין מאנסי פאר לאנגע שעות, און מיטוואך איז דער רבי אריינגעפארן קיין בארא פארק, און געפראוועט דעם ציבור אין ביהמ"ד נעימת החיים.
*****
וויזניץ וויליאמסבורג
דורכאויס די וואך פרשת כי תבוא איז באשטימט געווארן זמני קבלת קהל אין עטליכע שטעט, זונטאג נאכט האט דער רבי געפראוועט אין בארא פארק אין שטוב פון הנגיד החסיד ר' אהרן אלי' וויזניצער הי"ו, היינט דינסטאג נאכט וועט דער רבי פראווענען אין מאנסי אין שטוב פון הנגיד החסיד ר' הערשיל גרינבוים הי"ו, און דאנערשטאג נאכט אין לעיקוואד אין שטוב פון הנגיד החסיד ר' יחזקאל מאיראוויטש הי"ו.
*****
וויזניץ ירושלים
אין לויף פון פרשת כי תבוא און נצבים וילך וועט זיין קבלת קהל יעדן טאג נאך שחרית, און אזוי אויך אין די אווענט שעה'ן, עטליכע טעג בבית מדרשו, און עטליכע טעג בביתו נאוה קודש.
מוצאי שבת סליחות וועט דער רבי פראווענען בבית מדרשו אויף די צוויי און פערציגסטע סטריט. א טאג דערויף וועט דער רבי אפרייזן קיין ארץ ישראל צו וויילן אויף די ימים הנוראים בקרב חסידיו תושבי ירושלים עיר הקודש, דער רבי וועט זיך צוריקקערן ממחרת יום הכיפורים, און פראווענען יו"ט סוכות און שמחת תורה בבית מדרשו אין בארא פארק.
*****
וויזניץ לאנדאן
פארלאפענע וואך איז דער רבי אנגעקומען אויף א בליץ באזוך קיין מאנטשעסטער, צו באשיינען די שמחת החתונה ביי צוויי חסידים. די קורצע באזוך פונעם רבי'ן אין מאנטשעסטער איז אויך געווען געווידמעט צו געבן די געלעגנהייט פאר די חסידים תושבי העיר אריינצוגיין אל הקודש פנימה לקראת די הייליגע טעג הממשמשים ובאים, דער רבי שליט"א האט געזעגענט דעם ציבור חסידים בבית האכסניא אין שטוב פון הנגיד החסיד ר' חיים ווייס הי"ו ראה"ק סאטמאר מאנטשעסטער.
*****
זוועהיל
מיטוואך כי תבוא וועט דער רבי אויפנעמען די חסידים אין שטאט בית שמש, אין שטוב פון הרב החסיד ר' יוסף האפפמאן הי"ו אין די רמה ד' געגנט. און קומענדיגן זונטאג פרשת נצבים וילך וועט דער רבי אויפנעמען אין בני ברק, בבית מדרשו אויף רחוב רבי מאיר.
*****
טשערנאביל
זונטאג פרשת כי תבוא איז כ"ק אדמו"ר מטשערנאביל שליט"א אנגעקומען קיין לעיקוואד, אויפצונעמען די ציבור חסידים פאר די הייליגע טעג כנהוג, דער רבי האט זיך אויפגעהאלטן בבית האכסניא אין שטוב פון הנגיד החסיד ר' מתתיהו דייטש הי"ו, און דארט געדאווענט מעריב און געזעגנט דעם ציבור.
קומענדיגע וואך מאנטאג נצבים וילך וועט דער רבי אנקומען קיין וויליאמסבורג אויף קבלת קהל, אין שטוב פון הנגיד החסיד ר' נפתלי וועבער הי"ו.
*****
קאסוב
היינט דינסטאג פרשת כי תבוא וועט כ"ק אדמו"ר מקאסוב שליט"א אנקומען קיין מאנסי, אויפצונעמען די ציבור חסידים פאר די הייליגע טעג אזוי ווי זיין פאטער דער קאסובער רבי זצ"ל האט זיך געפירט יאר יערליך. דער רבי וועט פראווענען דעם ציבור אין שטוב פון הנגיד החסיד ר' איסר ראטה הי"ו, לאנגיעריגער בעל אבסניא פונעם קאסובער רבי'ן זצ"ל.
*
