יעצט זונטאג ביינאכט ביים צענטראלן מעמד הכתרה אין ביהמ"ד סקולען אין בארא פארק, האט הגה"צ ר' שמעון יואל וויינבערגער שליט"א גאב"ד וויטקא, חדב"ן הרה"ק בעל מאור ישראל מסקולען זי"ע, אויסגערופן און מכתיר געווען די צוויי קינדער פונעם סקולענער רבי'ן זצ"ל לשרת בקודש ממשיך צו זיין די אדמורו"ת לבית סקולען.
דער וויטקא רב שליט"א האט אויסגערופן אז כ"ק אדמו"ר הרה"צ רבי אהרן מאיר שליט"א וועט פירן ווייטער דא אין בארא פארק בבית מדרשו של אביו, באותו מקום וואו זיין גרויסער טאטע און זיידע האבן געפראוועט די עבודת הקודש לאנגע יארן, און כ"ק אדמו"ר הרה"צ רבי אליעזר זוסיא שליט"א ווערט אויפגענומען אלס אדמו"ר מסקולען אין לינדען, וואו ער וועט זיך בקרוב אריבערציען און מייסד זיין דעם שיינעם הויף.
דער וויטקא רב האט מאריך געווען בשבחם פון די צוויי חשובע ברידער כ"ק מרנן האדמורי"ם שליט"א, זאגענדיג אז ביידע זענען ראוי לאותו איצטלא און וועלן פועל'ן ישועות פאר אידישע קינדער, און משפיע זיין ברוחניות ובגשמיות לנו ולכל ישראל. אויף דערווייל ביז כ"ק אדמו"ר מסקולען לינדען שליט"א וועט זיך אריבערציען למקום מושבו אין לינדען, וועלן ביידע ברידער פראווענען אינאיינעם דא אין בית המדרש בשבת אחים גם יחד.
ביים מעמד הכתרה זענען פארזאמלט הונדערטער אידן פון נאנט און ווייט, אויפן בימת הכבוד זעען זיך אן די ברידער האדמורי"ם שליט"א, די פעטערס כ"ק מרנן האדמורי"ם שליט"א פון וויליאמסבורג, מאנסי, און לעיקוואד, די פעטערס הגה"צ אבד"ק וויטקא און כ"ק אדמו"ר מסטרעליסק שליט"א, און הגה"צ ר' שלמה אליעזר ברוינשטיין שליט"א אב"ד טערניווא שוואגער פונעם רבי'ן זצ"ל, און חותן המלך פונעם נייעם סקולענער רבי'ן שליט"א פון בארא פארק.
