די התרגשות ביי אלפי חסידי סקווירא איבער די גאנצע וועלט שטורעמט מיט פרייד אין די יעצטיגע טעג, ווען מ'ציילט שוין די שעות לקראת די היסטארישע דערגרייכונג, ווען עס וועט באנייעט ווערן די ריזן היכל בית המדרש הגדול והחדש אין שיכון סקווירא, שטייענדיג פינף און א האלב יאר זינט עס איז געלייגט געווארן די אבן הפינה במעמד אלפי חסידים ואנשי מעשה.
די היסטארישע דערגרייכונג איז די געשפרעך פון טאג ביי יעדע סקווירא חסיד באשר הוא, אלע קוקן ארויס דערצו זקנים עם נערים, הונדערט מיליאן דאללער איז שוין אריינגעלייגט געווארן אין דעם מאסיוון פראיעקט לנצח על מלאכת בית השם, אט אט גרייט מען זיך אפצורעכטן די ערשטע תפילה, וואס וועט זיין די ערשטע תפילה פון די היי יעריגע ימי הרחמים והסליחות, די ערשטע סליחות נאכט מוצאי שבת קודש במקהלות אלפי חסידים ואנשי מעשה.
די ריזן היכל איז שוין גרייט אצינד מיט צען טויזענט זיץ פלעצער, אריינגערעכנט די אכט גאלעריעס מסביב, געבנדיג א ערשטמאליגע הרחבה פאר כלל חסידי סקווירא צו קענען דאווענען מיט הרחבת הדעת, נאך וואס אינעם אלטן שוהל איז געווען פיל ווייניגער פלעצער ווייט פון גענוג. אזוי אויך ווערט צום ערשטן מאל צוגעשטעלט ספעציעלע זיץ פלעצער פאר די בחורי חמד, אויף צוויי דעזיגנירטע גאלעריעס, נאך וואס די בחורים האבן ביז היינט נישט געהאט קיין געהעריגע ארט וואו צו שטיין ביים דאווענען.
די גרויסע מעמד פתיחת ההיכל וועט פארקומען דעם מוצאי שבת קודש, און בהוראת הקודש פון כ"ק אדמו"ר מסקווירא שליט"א איז באשטימט געווארן א ספעציעלע סדר פאר די חנוכת הבית, צו באנייען דעם היכל מיט לימוד התורה א שעה ברציפות. די היכל וועט שוין זיין אפן תיכף מוצאי שבת כדי די ציבור חסידים זאלן זיך קענען אומקוקן אויף דעם בית הגדול והקדוש און זיך באקענען פונדערנאנט מיט די פילע איינריכטונגען.
האלב נאך עלף וועט זיך אנהייבן די מעמד פתיחת ההיכל, מיט א שעה רציפות ווי דערמאנט, טראץ וואס יעדער וועט לערנען מה שלבו חפץ, האט דער סקווירא רבי שליט"א געזאגט אז מען זאל אויך לערנען אביסל אינעם ספה"ק מאור עינים אויף עניני תפילה, צו געבן דעם ריכטיגן חסידישן הכנה לקראת די ערשטע תפילה אין די נייע שוהל.
צוועלף דרייסיג איז ערווארטעט די הופעת הקודש פון כ"ק אדמו"ר מסקווירא שליט"א אויף די בימת הכבוד ביים מזרח וואנט, עס וועט אויפטרעטן מיט א דרשה איינער פון די חשובע דיינים אין שטעטל, און דערנאך וועט דער רבי שליט"א וואונטשן מברכות קדשו לכל העם הנאספים. דערנאך וועט דער רבי פארזאגן אכצן קאפיטלעך תהלים בהתעוררות רב, לחנך ולהכשיר דעם נייעם בית מקדש מעט מיט הייסע תפילות.
תיכף דערנאך כחצות הלילה וועט מען זאגן סליחות בהתעוררות רב, פארגעזאגט דורכ'ן קביעות'דיגער בעל תפילה הגה"צ ר' חיים מאיר טווערסקי שליט"א בנו הצעיר פונעם רבי'ן שליט"א, דערנאך וועט דער רבי פארטיילן האניג לעקאך פאר אלע חסידים ווי איינגעפירט יאר יערליך.
מטעם קהילה קדושה צמח דוד אין שיכון סקווירא, וועט צומארגנס זונטאג ווערן צוגעשטעלט א ברייטע לחיים לרגל המאורע, מיטן ענדגילטיגן באנייאונג פון די דאווענען שטיבלעך אין די אונטערשטע שטאק, די אפיציעלע מעמד חנוכת הבית פארן בנין ביהמ"ד וועט פארקומען הערשט נאך א יאר, ווען די גאנצע בנין וועט באנייעט ווערן כלול בהדרו, וואס מען האפט אצינד צו זיין פערטיג ביז צום קומענדיגן יאר ראש השנה תשפ"ו.
מאנטאג נאכט וועט זיין א ספעציעלע געלעגנהייט פאר אלע נשים צדקניות צו כאפן א שפאציר אין די נייע בנין בית המדרש, און זעהן פונדערנאנט די געוואלדיגע הרחבת גבולי הקדושה, דעריבער וועלן די מניני מנחה מעריב מאנטאג נאכט פארקומען אין די אלטע בית המדרש.
