מיט קארגע פיר און צוואנציג שעה פארבליבן צו די היסטארישע רעבישע חתונה בחצרות הקודש סקווירא און וויזניץ מאנסי, זעהט זיך אן מאסיווע הכנות אין די גיגאנטישע קאמפלעקס פון ראקלענד קאמיוניטי קאלעדזש אין מאנסי, באקאנט אלס "RCC", וואו אויף מערערע פראנטן גרייט מען זיך אהערצושטעלן דעם ריזן זאל צו קענען אקאמאדירן טויזענטער חסידים פון נאנט און ווייט.
די בארימטע YF פראדאקשענס אין שפיץ פון ר' יוחי פליישמאן הי"ו גיבט זיך אפ מיט די גענויע פלענער און טעכנישע דעטאלן, די בארימטע "רענטעסטיק" פארטי רענטל פירמע שטעלט אהער די אריבער הונדערט טישן און בענק פאר אזויפיל מענטשן, סיי אין סאמע צענטער פונעם זאל פאר די זקני החסידים פני העדה און בני המשפחה, און סיי פאר די אנדערע אפטיילונגען וואו עס וועט סערווירט ווערן די סעודה פאר די בחורי חמד און ילדי תשב"ר.
די בארימטע לייט איט אפ פירמע איז פארנומען אהערצושטעלן אלע עלעקטעראנישע באדערפענישן, ווי צענדליגע בתי כבוד, לעקטערס, עיר קאנדישן, סינקס זיך צו וואשן, און נאך פארשידענע איינריכטונגען. און אזוי ווייטער זענען צענדליגע עסקנים פארנומען און ארבעטן רונדע דעם זייגער צו גרייט מאכן דעם גיגאנטישן קאמפלעקס וואס וועט האבן די מעגליכקייט אריינצונעמען טויזענטער באטייליגטע אויף א מאסן פארנעם.
