מיט פארקלעמטע הערצער האבן צענדליגע טויזענטער אידן באגלייט היינט למנוחת עולמים, האי גאון ישראל און שר התורה, הגאון הגדול רבי אשר דויטש זצ"ל ראש ישיבת פאנאוויטש, וועלכער איז נפטר געווארן היינט מיטאג אין עלטער פון ניין און זיבעציג יאר, לדאבון לב תלמידיו ומעריציו און די גאנצע עולם התורה.
דער ראש ישיבה זצ"ל איז אויפגעוואקסן בין כותלי ישיבת פאנאוויטש, זייענדיג א זון פון הגאון ר' בנימין זאב הכהן דויטש זצ"ל פון די נאנטע מקורבים ביים פאנאוויטשער רב זי"ע, אלע יארן איז ער צוגעשטאנען צו די וואוקס פון די ישיבה, און געווען פון די חשובע מרביצי תורה וועלכער האט פארגעלערנט שיעורים און אויפגעשטעלט זייער אסאך תלמידים נאמנים.
דער ראש ישיבה איז געווען באקאנט אלס א שטארקער קנאי, און אין די לעצטע יארן געווען פאררעכנט אלס דער מנהיג פון די בני תורה קרייזן די פלג הירושלמי, זייענדיג לוחם מלחמת השם ביד רמה, און מקנא קנאת השם צבקות.
די לעצטע תקופה איז ער געווען זייער נישט געזונט נאכן ליידן פון די ביטערע מחלה ה"י, און היינט מיטאג ארץ ישראל'דיגע צייט איז ער נפטר געווארן לחיי העולם הבא. די לוויה איז פארגעקומען אין די אווענט שעה'ן פארנט פון די פאנאוויטשע ישיבה אין בני ברק, ווען על פי צוואתו האט מען נישט אריינגעפירט די מיטה אין ביהמ"ד, אויך איז נישט געווען קיין הספדים לויט די צוואה, און שפעטער איז ער געקומען לקבורה אויפן פאנאוויטשער בית החיים אין בני ברק.
