דעם קומענדיגן דינסטאג הבא עלינו לטובה, וועט פארקומען א גרויסארטיגע מעמד אין שטאט סטעטן איילענד, וואס איז ערווארטעט צוזאמצוברענגען א גרויסע ציבור חסידים ואנשי מעשה פון נאנט און ווייט, מעמד חנוכת הבית פארן נייעם ביהמ"ד "מאור ישראל", און וועט באשיינט ווערן דורך כ"ק מרנן האדמורי"ם שליט"א לבית סקולען.
די נייע בית המדרש "מאור ישראל" וואס טראגט דעם נאמען לשמו ולזכרו פון כ"ק אדמו"ר הרה"ק מסקולען זי"ע בעל מאור ישראל, ווערט געעפנט דורך נכדו חביבו הגה"צ ר' אורי קלוגהופט שליט"א, זון פון חתנא דבי נשיאה כ"ק אדמו"ר מסטרעליסק שליט"א. אין די לעצטע פאר יאר איז אנגעגאנגען העפטיגע בוי ארבעט אהערצושטעלן דעם בנין בית המדרש, און אצינד גרייט מען זיך שוין צום פתיחת שערים אין א מזל'דיגע שעה.
די גרויסע מעמד חנוכת הבית וועט פארקומען קומענדיגן דינסטאג מקץ ליל כ"ד כסלו, אינעם היכל בית המדרש החדש אויף ברעדלי עוועניו, און וועט באשיינט ווערן דורך כ"ק מרנן האדמורי"ם מסקולען שליט"א, און פילצאליגע רבני העיר. עס וועט אויפטרעטן הגה"צ אבד"ק גרויסווארדיין סטעטן איילענד שליט"א, און הגה"צ ר' משה פריעדמאן שליט"א דומ"ץ סאטמאר ב"פ, שווער פונעם רב שליט"א מייסד הביהמ"ד.
