א ספעציעלע אסיפת חיזוק איז פארגעקומען פאר אלע משגיחי כשרות אינערהאלב די מערכת הכשרות דקהל ישמח משה נירבאטור, אינאיינעם מיט א סעודת ראש חודש און מסיבת חנוכה, פארלאפענעם מיטוואך ראש חודש טבת.
ביי רייך געדעקטע טישן זענען געזעצט געווארן די אריבער זעכציג משגיחי כשרות, וואס רעכנט אריין די משגיחים אין די בתי שחיטות, משגיחים בבדיקת תולעים, משגיחים פון די קעיטערינג זאלן אונטער די נירבאטור השגחה, משגיחים וואס גייען נאך די פראדוקציע פון אינגרידיענטס, מילכיגע פראדוקציע, און נאך פארשידענע סארט ארבעט.
בראש המסובים האט זיך אנגעזעהן הגה"צ גאב"ד נירבאטור שליט"א, וועלכער שטייט אין שפיץ פון דעם ריזיגן כשרות אפאראט, דער רב האט משמיע געווען דברי חיזוק און דערציילט די השתלשלות פון די השגחה, וואס איז היינט די לענגסטע אין פריוואטע כשרות על אדמת אמעריקע, און איז אוועקגעשטעלט געווארן בעידודו ובעצתו הרמה פון הרה"ק מסאטמאר זי"ע.
דער רב האט ארויסגעברענגט די געוואלדיגע סייעתא דשמיא וואס מ'זעהט כסדר אין די מערכת הכשרות, און די השגחה פרטית ווי דער אויבערשטער היט אויף זיינע קינדערלעך. אויך האט מען געהערט דרשות פון די רבני הביד"ץ ד'נירבאטור, הרה"ג ר' ליפא טייטלבוים שליט"א זון פונעם רב, הרה"ג ר' אלעזר אייכענשטיין שליט"א חדב"ן, און הרה"ג ר' מענדיל איינהארן שליט"א. אויך האט אויפגעטרעטן דער ראש השוחטים הרב חיים בצלאל בלום שליט"א, און הרב יעקב יצחק יאקאבאוויטש שליט"א ראש המשגיחים פון די עללי פרעססינג קאמפאני.
צווישן די רבנים און משגיחי כשרות האט זיך אנגעזעהן הרה"ג ר' יואל רוקח שליט"א אב"ד קאזלאוו מאנסי, רב המקומי אין די בית השחיטה עמפייע"ר רבות בשנים.
