גאר פרייליכע נייעס איז געמאלדן געווארן דעם דאנערשטאג נאכט וואס איז אויפגענומען געווארן מיט פרייד ביי תלמידי וחסידי סאטמאר, איבער דריי פרישע פאנטאסטישע נדבות דורך הנגיד החסיד ר' יואל לאנדא הי"ו, וואס וועט אלעס אינאיינעם צוברענגען פרישע עלף מיליאן דאללער פאר בניני המוסדות, און געטרייע שטיצע פאר די חברי ההנהלה.
דעם דאנערשטאג נאכט האט הנדיב החסיד ר' יואל לאנדא הי"ו אפגעראכטן א רייכע סעודת שבע ברכות אין זיין שטוב אין וויליאמסבורג, לכבוד די גרויסע שמחה בחצר הקודש סאטמאר, די כלה א טאכטער פון הגה"צ אבד"ק סיגעט שליט"א, בנו חביבו פון כ"ק אדמו"ר מסאטמאר שליט"א. צום שבע ברכות זענען געלאדנט געווארן די צענדליגע חברי ההנהלה פון אלע סאטמארע מוסדות איבער גרעיטער ניו יארק, לאות הוקרה פאר זייער געטריישאפט לצרכי הכלל והפרט.
כ"ק אדמו"ר מסאטמאר שליט"א האט אויפגעטרעטן מיט דברות קודש בשבחו פונעם בעל אכסניא, און דאן געמאלדן אז דער בעל אכסניא ר' יואל איז אנטקעגן געקומען די הנהלת המוסדות מיט א פאנטאסטישע נדבה פון פינף מיליאן דאללער, מיטן ציהל אויפצובויען צוויי ביליגע חתונה זאלן אויף א צוגענגליכע סטאנדארט, אין בנין הת"ת עטרת יואל, וואו עס איז ביז היינט געווען די גרויסע פראכטפולע עטרת אברהם זאל.
אזוי אויך האט אויפגעטרעטן דער מנכ"ל המוסדות פון קרית יואל הרה"ח ר' משה אלי' עסטרייכער הי"ו, וועלכער האט געמאלדן א באזונדערע פאנטאסטישע נדבה פון פינף מיליאן דאללער דורך הנדיב ר' יואל, אויפצובויען א שפאגל נייע תלמוד תורה געביידע אין די בלומינגראוו געגנט, וואס וועט טראגן דעם נאמען "בנין לאנדא", לכבוד זיינע חשובע עלטערן. און אויסער דעם האט ער דערביי מנדב געווען א באזונדערע מיליאן דאללער פאר מוסדות יטב לב בירושלים עיה"ק.
