חסידי בעלזא אין אמעריקע נעמען אויף מיט פרייד די פרישע מעלדונג מטעם הנהלת מוסדות בעלזא אין בארא פארק, אז בנו יחידו פון כ"ק אדמו"ר מבעלזא שליט"א הרה"צ ר' אהרן מרדכי רוקח שליט"א, וועט אנקומען אויף א ספעציעלע באזוך קיין בארא פארק מחזק צו זיין די מוסדות הקדושים, און פראווענען א געהויבענע שבת התאחדות פאר כלל חסידי בעלזא אין בארא פארק.
די באזוך ווערט אראנדזשירט דורך די עסקני המוסדות, וואס זענען פארנומען די טעג מיט די מאסיווע בוי פראיעקט אויף די הויכע קעטסקילס בערג, וואו עס ווערט אויפגעבויעט א נייע יונגל קעמפ "מחנה בני בעלזא" לשם ולתפארת, נאכפאלגענדיג די מעמד הנחת אבן הפינה פארלאפענעם חודש אב. אין א פרואוו אויפצוטרייבן גרויסע סכומים צו פינאנצירן די מאסיווע פראיעקט, איז באשטעטיגט געווארן אז הרה"צ ר' אהרן מרדכי שליט"א וועט קומען קיין ניו יארק און באשיינען א רייע מסיבה "מעמד המייסדים" וואס וועט פארקומען דעם קומענדיגן זונטאג פרשת כי תשא ברוב פאר והדר.
דער חשובער גאסט וועט שוין קומען צו פארן אינמיטן וואך פרשת תצוה, און פראווענען א געהויבענע שבת אין בארא פארק שבת תצוה פרשת זכור, זייענדיג גאנצע פופצן יאר זינט ער האט דאס לעצטע מאל געפירט א שבת פאר בעלזא חסידים אין בארא פארק.
