שטייענדיג נאנט צו א קיילעכיג יאר זינט די ליכט איז פארלאשן געווארן, מיטן הסתלקות לשמי מרום פון כ"ק אדמו"ר מקאסוב זצ"ל, האבן פילע תלמידים חסידים און מקורבים זיך פארזאמלט ביי א ספעציעלע מעמד מיטן נאמען "ליל התגלות", מיטן ציהל אוועקצושטעלן א פעסטע יסוד פארן רבינ'ס מכון, די דברי תורה און שמועסן פונעם רבי'ן זאלן קענען ערשיינען לאור עולם דעם רבינ'ס השפעה זאל ווייטער קענען אנגיין.
ווי באקאנט האט דער רבי זצ"ל געשטעלט חשובע אידן צו שטיין אין שפיץ פון מכון "שפה ברורה" וואס איז עוסק ארויסצוגעבן די דברי תורה פונעם רבי'ן, עס איז שוין ערשינען פארשידענע ספרים און כסדר'דיגע גליונות, און אצינד ווען מען האט פארברייטערט די פעולות ארויסצוגעבן אלע דברי תורה און כתבי הקודש פונעם רבי'ן, פעלט זיך אויס א פאראייניגטע שטיצע פון אלע חסידים און נאנטע צוגלייך.
א ספעציעלע מכתב קודש איז געשריבן געווארן דורך ממלא מקומו בקודש כ"ק אדמו"ר מקאסוב שליט"א, און א באזונדערע הארציגע בריוו פון אלע קינדער, זיהן און איידימער פונעם רבי'ן זצ"ל. די גרויסע מעמד איז פארגעקומען פארלאפענעם דאנערשטאג נאכט אין די פראכטפולע נייע זאל בבנין מוסדות באבוב אין בארא פארק, מיט די באטייליגונג פון פילע אידן ידידי ומעריצי בית קאסוב.
ספעציעלע מאמענטן איז געווען ווען עס איז געוויזן געווארן א רייכע פרעזענטאציע פונעם רבינ'ס ספרים צימער, די הייליגע עבודה וואס דער רבי האט אריינגעלייגט רבות בשנים אריינצושיינען אמונה און תורה אין אידישע הערצער, געזעסן און געשריבן בריוו און קונטרסים, און משפיע געווען פאר אידישע קינדער תורה וחסידות.
אויפן בימת הכבוד זענען געזעסן אלע קינדער פונעם רבי'ן, מען האט געהערט א דרשה פונעם רבינ'ס ברודער כ"ק אדמו"ר מזאליטשיק שליט"א, און די משא המעמד פון הגה"צ ר' אהרן האגער שליט"א נשיא המכון, בנו חביבו פונעם רבי'ן זצ"ל. דערנאך האט מען געהערט דברי ברכה פונעם עלטסטן זון כ"ק אדמו"ר מקאסוב שליט"א, און דערנאך האט כ"ק אדמו"ר מקאסוב שליט"א משמיע געווען דברי ברכה לכבוד העם הנאספים.
א ספעציעלע שמועס איז געווען צווישן העסקן המרומם ר' מאיר מרדכי בערקאוויטש הי"ו, מיט הרב החסיד ר' מאיר גאדינגער הי"ו יושב ראש מכון שפה ברורה, וועלכער האט אויפגעוויקלט שיינע זכרונות פונעם רבי'ן זצ"ל, און די געוואלדיגע עבודה פונעם רבי'ן צו פארשפרייטן אמונה און בטחון פאר אידישע קינדער דורך די כתבי קודש און דברי תורה.
