היינט נאכמיטאג אין ארץ ישראל איז פארגעקומען א היסטארישע באגעגעניש צווישן גדולי ישראל בארץ הקודש, אין ליכט פון די גזירת הגיוס וואס ליגט אויפן טיש ביי די גדולי ומאורי הדור, ווען די מדינת ישראל רעגירונג גרייט זיך צו שטימען אויף א געזעץ אריינצושלעפן בחורי הישיבות אין די מיליטער היל"ת.
אין א היסטארישע שריט איז כ"ק אדמו"ר מגור שליט"א ארויסגעפארן קיין בני ברק למעון תורתו פון מרן הגאון הגדול רבי דוב לאנדא שליט"א ראש ישיבת סלאבאדקע, צו וואו אהין עס איז אויך געקומען מרן הגאון הגדול רבי משה הלל הירש שליט"א ראש ישיבת סלאבאדקע. אינאיינעם האבן די דריי גדולי הדור דעבאטירט די גזירה נוראה און צונויפגעשמועסט פארשידענע מהלכים וויאזוי צו רעאגירן דערצו מיטן האפענונג צו קענען אפראטעווען די יהדות החרדית בארץ הקודש.
פריער אין טאג האט דער מדינת ישראל פרעמיער מיניסטער זיך פארבינדן טעלעפאניש מיט כ"ק אדמו"ר מבעלזא שליט"א, און מיט מרן הגאון הגדול רבי משה הלל הירש שליט"א ראש ישיבת סלאבאדקע, וואו ער האט פארגעלייגט פארשידענע פלענער וואס ליגט אויפן טיש אין די רעגירונגס ביורא.
