חסידי גור אין אמעריקע האבן מיטגעלעבט געהויבענע טעג, בצלו פונעם חשובן גאסט הגה"צ ר' נחמי' אלתר שליט"א בנו חביבו ויקירו פון כ"ק אדמו"ר מגור שליט"א, וועלכער איז אנגעקומען צוגאסט קיין ניו יארק באשיינען א רייע מעמדים און מחזק זיין קהל עדת חסידי גור בארה"ב.
אין לופטפעלד האבן אפגעווארט די חשובע עסקני הקהילה און א צאל חסידים, אינאיינעם מיט הרב שמואל באטמאן הי"ו דער חב"ד רב אין די קענעדי לופטפעלד, די ערשטע מעמד פארמאלע מעמד איז געווען א באזוך אין די נארוואס פארענדיגע נייע בנין התלמוד תורה אמרי אמת דחסידי גור אין בארא פארק, וואו עס איז פארגעקומען א מעמד קביעת מזוזה פאר די נייע געביידע, מיט די באטייליגונג פון א ענגע צאל מקורבים און עסקני המוסדות. דער יושב ראש המעמד איז געווען הרב אברהם שמידט הי"ו מנכ"ל, און דער חשובער גאסט האט אויפגעטרעטן מיט ווערטער איבער די גרויסע זכיה צו מחנך זיין א נייע בנין לתורה ולתפילה.
דערנאך האט דער חשובער גאסט מנחם אבל געווען ביים משמש בקודש הרב החסיד ר' יוסף יצחק כהן הי"ו.
א זעלטן געהויבענע שבת איז אריבער אויף די פילע חסידים תושבי בארא פארק, ווען דער חשובער גאסט הגה"צ ר' נחמי' שליט"א האט געפראוועט ברוב עם, און געדאווענט די תפילות פרייטאג צונאכטס אין די נייע שטיבל ברכת אליהו אויף די אכצנטע עוועניו. נאכן דאווענען איז א ריזן ציבור תושבי העיר אריבער ביים חשובן גאסט שלום נעמען און וואונטשן א גוט שבת.
פרייטאג צונאכטס נאך די סעודה בבית האכסניא, איז פארגעקומען א געהויבענע שבת אחים "טרונק", אין ביהמ"ד ברכת אליהו דחסידי גור, די זמירות איז געווארן פארגעזינגען דורך הרב החסיד ר' יוסף יאלאס הי"ו, און דער חשובער גאסט האט אויפגעטרעטן מיט דברי תורה, און נאכגעברענגט חידושי תורה און מאמרי חסידות פון אביו הגדול כ"ק אדמו"ר מגור שליט"א. אזוי אויך האט אויפגעטרעטן הגה"צ ר' הערשל ראטטענבערג שליט"א רב חסידי גור אין אמעריקע, און הרב החסיד ר' איטשע מאיר טאומאן הי"ו מזכיר בית כ"ק אדמו"ר מגור שליט"א.
שבת אינדערפרי האט מען געדאווענט אין די היכל ישיבה קטנה, אינאיינעם מיט די מתפללים אין בית החסידים בית ישראל דוד, עס איז פארגעקומען די שמחת האויפרוף במעונו פון הרב החסיד ר' אברהם מרדכי ווייץ הי"ו, און פילע גערער חסידים זענען געקומען דאווענען די תפילות אינאיינעם מיטן חשובן גאסט, וועלכער האט נאכן דאווענען געפראוועט א גרויסע קידוש לכבוד די שמחה.
מנחה און שלש סעודות איז געפראוועט געווארן אין די היכל המתיבתא געאייגענט פאר די בחורי חמד, און דער חשובער גאסט האט אויפגעטרעטן מיט פאסיגע ווערטער פאר די בחורי חמד. מוצאי שבת איז פארגעקומען א ספעציעלע באזוך אין שטוב פון הרבני החסיד המרומם ר' שלמה ווערדיגער הי"ו יושב ראש אגודת ישראל בארה"ב, און נשיא המוסדות פון איחוד מוסדות גור בארץ הקודש.
שפעטער מוצאי שבת איז פארגעקומען די צענטראלע מעמד "טהרנו בשלימות" אין די פראכטפולע זאלן פון עטרת גאלדא, וואו אלע חסידים זענען זיך צוזאמגעקומען זיך צו מחזק זיין קעגן די נסיונות הדור און שטייגן העכער אין עשה טוב. דער אורח הכבוד איז געווען הגה"צ ר' אהרן זלמן יונגרייז שליט"א ראש ישיבת סערדאהעלי, און דער חשובער גאסט הגה"צ ר' נחמי' האט אויפגעטרעטן מיט דברים חוצבים מלהבת אש, אזוי אויך דער רב הקהילה הגה"צ ר' הערשל ראטטענבערג שליט"א.
זונטאג אויפדערנאכט איז פארגעקומען א פראכטפולע דינער לטובת די קופת עזר נישואין גמ"ח בית ישראל, עס איז פארגעקומען אין די הערליכע מעטריפאליטען זאל געאייגענט פאר די חשובע חסידים די נדיבי לב, דער חשובער גאסט הגה"צ ר' נחמי' שליט"א האט אויפגעטרעטן מיט א שיינע דרשה, און דערציילט ערשטהאנטיגע געשיכטעס פון די גלאררייכע אויפטואונגען דורך די הנהלת הקופה.
