אין די יעצטיגע טעג איז באשטעטיגט געווארן מטעם בית כ"ק אדמו"ר מקארלין סטאלין שליט"א, אז דער רבי וועט פראווענען א גרויסע שבת אין שטאט דעטרויט אין מישיגען, קומענדיגן פרשת תזריע טהרה, וואס קומט אויס צוויי וואכן נאך יו"ט פסח.
דער רבי שליט"א פארט יעדעס יאר ארויס קיין דעטרויט לרגל די יומא דהילולא קדישא פון זיין פעטער הרה"ק רבי יעקב חיים מסטאלין דעטרויט זי"ע, מקום מנוחת קדשו דארט אין דעטרויט, און היי יאר ווען די יומא דהילולא קדישא ה' אייר געפאלט אויס בעצם יום השבת, וועט דער רבי פראווענען א גרויסע שבת אין שטאט מיט די באטייליגונג פון הונדערטער חסידים פון איבער דער גארער וועלט.
אין די יעצטיגע טעג איז געעפנט געווארן א מאסיווע הרשמה דרייוו, וואו עס ווערט געגעבן די געלעגנהייט פאר די חסידים זיך איינצושרייבן מיטצוהאלטן דעם גרויסן שבת, סיי אינגעלייט, סיי בחורים, און סיי קינדער פון ניין יאר און העכער אונטער די אויפזיכט פון זייערע עלטערן. א ריזן שאטער וועט ווערן אויפגעשטעלט פאר די תפילות און טישן, און זונטאג אינדערפרי וועט מען פוקד זיין דעם ציון הק' להיפקד בדבר ישועה ורחמים.
