תלמידי וחסידי חצר הקודש ווערדאן גרייטן זיך בהכנה דרבה צום גרויסן מעמד הכנסת ספר תורה וואס וועט פארקומען די וואך, אין די טעג ארום די יומא דהילולא קדישא פון מאורם ורבם כ"ק אדמו"ר הרה"ק מווערדאן זצ"ל, שטייענדיג גאנצע פינף יאר זינט די הסתלקות לשמי מרום.
די ספר תורה איז געשריבן געווארן דורך פילע תלמידי וחסידים וואס האבן געקויפט זכותים, מנציח זיין שמו הקדוש פונעם אומפארגעסליכן רבי'ן זצ"ל, און עס וועט ווערן אריינגעפירט בקול צהלה ורנה צום ווערדאנער בית המדרש אין בארא פארק, וואס טראגט דעם הייליגן נאמען "קדושת יוסף" לשמו ולזכרו פונעם רבי'ן זצ"ל.
מארגן זונטאג וועט געגעבן ווערן די געלעגנהייט פאר די חסידים צו אריינשרייבן אן אות אין דעם הייליגן ספר תורה, ביי א ספעציעלע מעמד כתיבת האותיות וואס וועט פארקומען בבית מדרשו של רבי, אין ביהמ"ד ווערדאן אין פלעטבוש, דארט וואו דער רבי זצ"ל האט לאנגע יארן אפגעראכטן די עבודת הקודש בסילודין. מאנטאג וועט פארקומען די כתיבת האותיות אין ביהמ"ד ווערדאן אין בארא פארק, און דינסטאג נאכמיטאג וועט פארקומען די סיום כתיבת האותיות דורך אדמורי"ם ורבנים ובני המשפחה אין שטוב פון הנגיד החסיד ר' ברוך פיללער הי"ו.
דינסטאג זעקס אזייגער נאכמיטאג וועט די ספר תורה ווערן ארויסגעפירט לרחובה של עיר, און עס וועט ווערן אריינגעפירט ברוב שמחה וחדוה צום היכל ביהמ"ד ווערדאן, אין א ריזן שטח וואס ווערט צוגעגרייט פארנט פונעם בנין ביהמ"ד, צו קענען אקאמאדירן דעם ריזן ציבור בליעה"ר. די סעודה לגומרה של תורה און כינוס הילולא קדישא וועט פארקומען אין די זאלן פון כרם מנחם, אין שפיץ פונעם רבי'ן שליט"א וועלכער וועט משמיע זיין דברות קודש און דברי ברכה, און א ספעציעלע דרשה צדיק מה פעל וועט מען הערן מפום ממלל רברבן כ"ק אדמו"ר מקאסאן שליט"א.
אין די יעצטיגע טעג איז כ"ק אדמו"ר מווערדאן שליט"א פון ב"פ ארויפגעגאנגען לבתי אדמורי"ם ורבנים איינצולאדענען צום מעמד הכנסת ספר תורה, און ביים סעודת מצוה אין זאל פון כרם מנחם וועט פארטיילט ווערן א ספעציעלע מזכרת, א ספר מבני היכלא מיט עובדות וסיפורים פונעם רבי'ן זצ"ל.
