א שוידערליכע טראגעדיע האט פאסירט היינט שבת נאכמיטאג ביי די גרעניץ פון בארא פארק, ווען א אידישע מאמע מיט צוויי קינדערלעך זענען טראגיש אומגעקומען רח"ל ווערנדיג אראפגעקלאפט דורך א קאר, און נאך א קליין קינד איז קריטיש פארוואונדעט געווארן ה"י.
עס האט פאסירט ארום איינס אזייגער נאכמיטאג בעצם יום השבת, אויף אושען פארקוועי וואו בארא פארק גרעניצט זיך מיט פלעטבוש, די מאמע מיט אירע קינדער זענען געווען אויף א שפאציר, ווען מיטאמאל האבן צוויי שנעלפארנדע קארס זיך צוזאמגעקראכט, אין רעזולטאט האבן די צוויי קארס פארלוירן קאנטראל און אראפגעקלאפט די משפחה אויף א שווערע פארנעם, ווען איין קאר האט זיך אויך איבערגעדרייט אין רעזולטאט פון די עקסידענט.
ליידער איז באשטעטיגט געווארן די שוידערליכע געשעעניש אז די מאמע מיט צוויי פון אירע קינדער זענען טראגיש אומגעקומען רח"ל, און נאך א קינד איז קריטיש פארוואונדעט געווארן און געפונט זיך אין שפיטאל אין א שווערע געזונט צושטאנד.
די פארנומענע אושען פארקוועי איז געקומען צו א האסטיגן אפשטעל ווערנדיג פארשלאסן פאר אויספארשונגען, דורכ'ן טאג איז דער מעיאר פון ניו יארק סיטי עריק עדעמס אראפגעקומען אויפן סצענע צו צייגן גרייטקייט צו העלפן פערזענליך, און יעצט מוצאי שבת געפונען זיך אויפן סצענע די עסקנים פון חסד של אמת און מתעסקים צו פארזיכערן כבוד המתים אויפן העכסטן פארנעם.
מער פרטים איז דערווייל נאכנישט ערשינען, און אידישע קינדער זענען מתפלל שלא ישמע עוד שוד ושבר בגבולינו, מען זאל נאר הערן גוטע בשורות, און די פארוואונדעטע, פינחס רפאל בן שרה, זאל האבן א גענצליכע רפואה.
