תלמידי וחסידי סאטמאר נעמען אויף מיט פרייד די גאר פרייליכע נייעס להרחיב גבולי הקדושה, ווען די עסקני הקהילה אין ביהמ"ד ברך משה ד'סאטמאר אין בארא פארק זענען אריינגעשפרינגען אין א פרישן פראיעקט בברכת הקודש פון כ"ק אדמו"ר מסאטמאר שליט"א, אפצוקויפן א הערליכע בנין רחבת ידים אין שטאט בארא פארק, וואס וועט דינען אלס אכסניא של תורה פאר די קהילה נאה וחסידה, וואס איז פקיע שמיה איבער די גאנצע שטאט שוין א שיינע פאר יאר.
די בית המדרש "ברך משה" ווערט געפירט דורך הגה"צ ר' משה דוד הורוויץ שליט"א רב הביהמ"ד, א זון פון הגה"צ ר' ישראל חיים הורוויץ שליט"א מראחוב ואבד"ק סאטמאר מאנטשעסטער. די בית המדרש געפונט זיך אצינד ביים ווינקל פון די דרייצנטע עוועניו און די דריי און פערציגסטע סטריט, און די שטארקע נויט צו פארברייטערן די גבולי הקדושה זעט זיך אן אויף א דריגענדע פארנעם.
אצינד זענען די עסקני הקהילה אריינגעשפרינגען אין דעם פראיעקט אפצוקויפן א הערליכע געביידע ביים ווינקל פון די דרייצנטע עוועניו און די צוויי און פערציגסטע סטריט, די נייע געביידע איז שפאגל ניי, און מיט מינימאלע רענאוואציעס און איינריכטונגען קען מען עס אהערשטעלן פאר א ריכטיגע אכסניא של תורה ותפילה און א בית מקדש מעט.
לויטן פלאן וועט די היכל בית המדרש אויפן ערשטן שטאק פארמאגן פינף טויזענט סקווער פיס, מיט גאר א שטארקע רחבות און הונדערטער זיץ פלעצער. אין צוגאב וועט מען אויפבויען א מקוה אויף די אונטערשטע שטאק, נאך שטיבלעך צום דאווענען, און א היכל התורה פאר די חשובע לומדים אין ביהמ"ד.
די פרייליכע נייעס צייגט אויף א מעכטיגע אימפעריע אינערהאלב קהילה קדושה סאטמאר אין בארא פארק, ווען מען האלט אינמיטן עטליכע אנגייענדע בוי פראיעקטן פון הרחבת גבולי הקדושה, א בית המדרש ווערט געבויעט ביים אנדערן עק בארא פארק ביי די געוועזענע געביידע פון פאראדייס מענאר, און נאך פארשידענע פראיעקטן פון בתי מדרשים און בניני המוסדות לשם ולתפארת.
