אין די פינסטערניש פון די נאכט, ארום דריי דרייסיג היינט פארטאגס, איז כ"ק אדמו"ר מטשערנאביל שליט"א אנגעקומען אויף א איבערראשנדע באזוך אין די לוד לופטפעלד אין ארץ ישראל, מיטן ציהל צו באגלייטן און מנחם אבל זיין ר' צדקה יהושע סעדה הי"ו וועלכער איז ליידער טראגיש פאר'אבל'ט געווארן פון זיין ווייב און צוויי קינדערלעך, ביי די שוידערליכע עקסידענט דעם שבת אין פלעטבוש.
ווי באריכטעט זענען די דריי נפטרים געפירט געווארן קיין ארץ ישראל לקבורה, און היינט פארטאגס האט דער טאטע ר' צדקה יהושע זיך אומגעקערט אהיים קיין אמעריקע, ווען צו זיין גרויס איבערראשונג האט ער באגעגנט אין לופטפעלד כ"ק אדמו"ר מטשערנאביל שליט"א וועלכער איז ספעציעל ארויסגעפארן צו מנחם אבל זיין און באגלייטן דעם צובראכענעם בעל צדקה. א לענגערע צייט איז דער רבי געזעסן און מחזק געווען די אבלים מיט טרעפליכע דברי חיזוק, און דערציילט שטארקע סיפורים פון פריערדיגע צדיקים אין דעם געביט.
