פרייליכע נייעס ווערט געמאלדן היינט פאר תלמידי וחסידי סאטמאר אין בארא פארק, אז נאך א צייט אפשניט פון גאנצע פיר יאר וועט כ"ק אדמו"ר מסאטמאר שליט"א מופיע זיין בשערי העיר ואם בישראל בארא פארק, און פראווענען א געהויבענע שבת בקרב עדת צאן מרעיתו תושבי העיר.
די פרייליכע מעלדונג קומט אין א צייט וואס די סאטמארע קהילה אין בארא פארק שפרודלט מיט פרישע פראיעקטן פון הרחבת גבולי הקדושה, ווען עטליכע בוי פראיעקטן זענען אקטיוו אויפצובויען פרישע בתי מדרשים פאר תלמידי וחסידי סאטמאר אין עטליכע געגנטער לענגאויס די שטאט בארא פארק, ווען די גבולי הקדושה פארברייטערן זיך אויף א קאלאסאלן פארנעם.
דעם ערשטן שבת נאך יו"ט פסח, שבת פרשת שמיני מברכים חודש אייר, וועט דער רבי שליט"א פראווענען בעז"ה בקרב הקהילה אין בארא פארק, און אזוי אויך וועט דער רבי וויילן אין שטאט אין די טעג ארום שבת מיטן ציהל צו דערהייבן די קרן התורה והחסידות אינערהאלב די קהילה קדושה, און משפיע זיין פאר די חסידים תושבי העיר פונדערנאנט.
אין די יעצטיגע טעג האבן די עסקני הקהילה זיך גענומען צו די ארבעט אויסצורעכענען אלע דעטאלן, און באשטימען א גוטע אכסניא פאר די תפילות און טישן דורכאויס שבת צו קענען אקאמאדירן דעם ריזן ציבור חסידים וואס איז ערווארטעט מיטצוהאלטן דעם געהויבענעם שבת.
