מיט איבערגיסנדע רגשי שבח והודאה טוען אלפי חסידי באבוב 45 ברחבי תבל ערהאלטן די פריידיגע בשורה, אז נאך לאנגע יארן וואס מען קוקט ארויס אויף דעם היסטארישן מאמענט, איז באשטימט געווארן אז אויף קומענדיגן חודש תשרי הבעל"ט די ירח האיתנים, וועט געעפנט ווערן די טויערן פון די גיגאנטישע בנין החדש "מרכז העולמי דחסידי באבוב 45", וואס ווערט געבויעט לשם ולתפארת אין צענטער פונעם עיר ואם בישראל בארא פארק אויף די 49'סטע גאס און די 14'טע עוועניו.
אין די יעצטיגע טעג באלד נאכן יום טוב פסח וועט געלאזט ווערן אין גאנג דער מגבית 'פתיחת שערים', וועלכע כשמו הוא כן הוא, דער קאמפיין וועט דינען אלס דער פינאנציעלער רוקן-ביין אז מ'זאל זיך טאקע קענען אריינציען אינעם נייעם בנין אויף ראש השנה תשפ"ו.
די גיגאנטישע בית המדרש ווערט געבויעט מיטן הילף פון אלפי תלמידים וחסידים, וואס האבן זיך שוין געלאזט קאסטן שווערע געלטער צו פינאנצירן דעם פראיעקט לנצח על מלאכת בית השם, עטליכע יאר גייט שוין אן די בוי ארבעט אין פולן שוואונג, און אין די לעצטע חדשים איז געמאכט געווארן גאר שטארקע פארשריט אינעווייניג אינעם בנין האדיר, און מען שטייט אצינד בלויז עטליכע חדשים אוועק פונעם מאמענט פון פתיחת שערים, זיך גרייטענדיג צו באנייען דעם בית הגדול והקדוש אויף וואס אלע חסידים קוקן שוין ארויס לאנגע יארן!
אצינד לכבוד יום טוב פסח ערשיינט די ערשטע מודעה איבער דעם מגבית פתיחת שערים, ווען גלייכצייטיג ווערט מיט פרייד געמאלדן אז אויף קומענדיגן יום טוב ראש השנה שנת תשפ"ו וועט מען באנייען דעם בנין הגדול דעם מרכז העולמי, אנגעהויבן מיט די הייליגע תפילות אין די ימים הנוראים, ראש השנה און יום הקדוש, נאכגעפאלגט מיט די פרייליכע טעג פון זמן שמחתינו, יום טוב סוכות און שמחת תורה ווען עס וועט ווערן אפגעראכטן די לעכטיגע הקפות אינעם נייעם גרויסן היכל מיט הרחבת הדעת פאר די טויזענטער חסידים פון נאנט און ווייט.
