נאך לאנגע יארן וואס חסידי וויזניץ קוקן ארויס אויף דעם מאמענט, איז היינט דינסטאג ענדליך פארגעקומען די מעמד יציקת היסודות פאר די נייע בנין האדיר מרכז העולמי ישועות משה, וואס ווערט געבויעט אין צענטער פון שטאט בני ברק אלס צענטערפונקט און תל תלפיות פאר חסידי וויזניץ, אין שפיץ פון כ"ק אדמו"ר מוויזניץ שליט"א.
די בוי ארבעט אהערצושטעלן דעם גיגאנטישן בנין האט זיך שוין אנגעהויבן עטליכע יאר צוריק, אבער די בוי ארבעט איז געווען היבש שווער צו קענען צוגרייטן דעם באדן ארויפצוציען א מאלטי שטאקעדיגע געביידע. אצינד ווען מען האט דערגרייכט דעם מאמענט האבן פינף הונדערט צעמענט טראקס געגאסן די יסודות איין טאג נאכן אנדערן, ווען צום הויכפונקט איז היינט פארגעקומען די מעמד יציקת היסודות במעמד קהל רב.
פילע חסידים זענען זיך צוזאמגעקומען אויפן ארט, ביים פארקינג לאט פון די היכלי מלכות זאל אויף רחוב שלמה המלך, אין שפיץ פונעם רבי'ן שליט"א וועלכער האט פערזענליך געגאסן די יסודות, און מכבד געווען די ראשי העדה און נדיבים בעם צו גיסן צעמענט, מען האט געזינגען פרייליכע ניגונים און זיך ארויסגעלאזט אין א פייערדיגע ריקוד צו דאנקן דעם אויבערשטן אז מען האלט שוין פאראויס אינעם בוי פראיעקט.
