שטייענדיג בעפאר די יומא דהילולא קדישא פונעם הייליגן שרף פון מאגלניצא, הרה"ק רבי חיים מאיר יחיאל זי"ע, גרייט זיך כ"ק אדמו"ר מתולדות צבי ספינקא שליט"א אונטערצונעמען א מסע הקודש קיין פוילין, צו פוקד זיין דעם ציון הק' בעצם יומא דהילולא קדישא.
ווי באקאנט האט דער רבי שליט"א אריינגעלייגט שטארקע כוחות צו אויפבויען א פראכטפולע בנין הכנסת אורחים אין שטאט מאגלניצא, סמוך ונראה צום ציון הק' פונעם הייליגן שרף זי"ע, צו פארגרינגערן פאר די פילע מתפללים ביים ציון הק'. אצינד ווען די בוי ארבעט רוקט זיך פאראויס בעז"ה און מען האפט שוין צו קענען באנייען אויף דעם יארצייט א טייל פונעם בנין, גרייט זיך דער רבי ווידערמאל ארויסצופארן קיין מאגלניצא, ווי איינגעפירט כסדר אז דער רבי פארט אהין צום יארצייט.
דער רבי וועט ארויספארן קומענדיגן זונטאג י"ג אייר, און זיין צוריק אין ניו יארק דינסטאג אויפדערנאכט. אין לויף פון די טעג וועט דער רבי פוקד זיין דעם ציון הק' פון זקינו הרה"ק מראפשיץ זי"ע בעל זרע קודש, שטייענדיג אין די טעג ארום די יארצייט, און ביים ציון הק' פונעם הייליגן רבי'ן ר' אלימלך זי"ע אין ליזענסק, ווען צום הויכפונקט וועט זיין די מעמד תפילה ביים ציון הק' פונעם הייליגן שרף זי"ע אין שטאט מאגלניצא, בעצם יומא דהילולא קדישא ט"ו אייר.
