בחצר הקודש באיאן איז אין די יעצטיגע טעג באשטימט געווארן א פרייליכע חגיגה, ווען צום ערשטן מאל בקורות ימי החסידות וועט געפראוועט ווערן א גרויסע רעבישע חתונה אינעם גרויסן באיאנער קלויז, ביהמ"ד הגדול אין ירושלים עיר הקודש.
די רעדע איז פון די שמחת החתונה פון א אייניקל ביי כ"ק אדמו"ר מבאיאן שליט"א, עלטסטע קינד ביים רבינ'ס זון הגה"צ רבי מרדכי שלמה ברייאר שליט"א רב חסידי באיאן אין אמעריקע, איידעם ביי כ"ק אדמו"ר מדזיקוב וויזניץ שליט"א, מיט די כלה א טאכטער פון הגה"צ ר' אהרן אויערבאך שליט"א, זון פון הגה"צ ר' מרדכי אויערבאך שליט"א אבד"ק אביר יעקב אין תל אביב, נין ונכד לצדיקי בית רוזין, קאפיטשניץ, און סערט וויזניץ זצ"ל.
די גרויסע שמחה ברענגט אויף גרויס התרגשות ביי כלל חסידי באיאן איבער די וועלט, ווען די חתונה וועט צום ערשטן מאל ווערן אפגעראכטן בתוככי בית המדרש הגדול דחסידי באיאן, אינעם גרויסן קלויז אויף רחוב מלכי ישראל אין ירושלים, וואס איז אין די לעצטע פאר יאר פראכטפול פארענדיגט געווארן כלול בהדרו לשמחת לב די טויזענטער חסידים, וואס טוען אין דעם בית המדרש זיך מסתופף זיין תמידין כסדרן בצל הקודש פונעם רבי'ן זאל געזונט זיין.
די חתונה איז באשטימט אויף אנהייב ווינטער, מאנטאג פרשת לך לך ה' חשון, און די גרויסע שבת אויפרוף וועט פארקומען בצל הקודש, אינעם גרויסן שבת הילולא קדישא ג' חשון, די יארצייט פונעם ריש שושולתא קדישא דער הייליגער רוזינער זי"ע דער סבא קדישא.
ביז היינט פלעגן די שמחות החתונות בחצר הקודש באיאן פארקומען אין געדונגענע פלעצער, מיט עטליכע יאר צוריק איז געפראוועט געווארן די שמחת החתונה פונעם יונגסטן קינד ביים רבי'ן, אין די גרויסע די סיטי פעסטונג נעבן ירושלים, פאריאר איז פארגעקומען א חתונה פון א אייניקל ביים רבי'ן אין עיר הבירה לאנדאן, און נאך א חתונה פון א אייניקל אין ביהמ"ד הגדול אין קרית וויזניץ בני ברק.
