חסידי וויזניץ נעמען אויף מיט פרייד די מעלדונג אז קומענדיגע וואך וועט בעז"ה פארקומען די לאנג ערווארטעטע מעמד "הנחת אבן הפינה" פאר די נייע בית המדרש הגדול והחדש אין קרית וויזניץ קייאמישע לעיק, ביום ל"ג בעומר הבעל"ט.
די פלענער אויפצובויען א נייע בית המדרש אין שטעטל גייט שוין אן פאר עטליכע יאר, ווען די עקזיסטירנדע בית המדרש איז שוין לאנג אויסגעוואקסן איר געברויך, איבערהויפט ווען עס קומט די גרויסע שבתים און ימים טובים, ווען די שטעטל איז לובש חג מיט הונדערטער געסט וואס קומען זיך מסתופף זיין בצל הקודש פון כ"ק אדמו"ר מוויזניץ שליט"א פון קייאמישע, און די ביהמ"ד קען נישט פארנעמען דעם ריזן צאל מתפללים.
מיט עטליכע וואכן צוריק האט מען אין א מזל'דיגע שעה אנגעהויבן אויסהאקן די ביימער, אויפן שטח וואו עס וועט בעז"ה אויפגעבויעט ווערן די נייע ריזן היכל בית המדרש, צווישן די הייזער אין שטעטל, און די בנין הישיבה בנין אבות, הארט נעבן ביתו נאוה קודש פון הרה"ק בעל תורת מרדכי מוויזניץ זי"ע, וועלכער פלעגט דארט וויילן יעדעס יאר אין לויף פון די זוממער וואכן.
אצינד גרייט מען זיך צום געהויבענעם מאמענט ווען עס וועט געלייגט ווערן די אבן הפינה פאר די נייע ביהמ"ד, עס וועט פארקומען קומענדיגע וואך ל"ג בעומר, די מעמד וועט זיך אנהייבן מיט אמירת תהלים כנהוג, און שפעטער וועט דער וויזניצער רבי שליט"א אפרעכטן דעם טיש לכבוד ל"ג בעומר אינעם יעצטיגן היכל ביהמ"ד.
די גרויסע מעמד הנחת אבן הפינה וועט פארקומען גענוי א יאר זינט די מעמד הנחת אבן הפינה פאר די נייע דעוועלאפמענט אין גיבערס, וואס איז פארגעקומען פארלאפענע יאר ביום ל"ג בעומר. שטייענדיג אצינד א יאר דערויף זעט זיך אן די מאסיווע פארשריט ביים נייעם דעוועלאפמענט, ווען צענדליגע הייזער שטייען שוין אויפגעבויעט, און זענען שוין אט אט גרייט אריינצונעמען נייע איינוואוינער.
