מיט ווייניגער ווי צוויי חדשים פארבליבן צום יומא דהילולא קדישא פון כ"ק אדמו"ר הרה"ק מראחמיסטריווקא זי"ע וואס געפאלט ביום כ"ט אב, ערב ראש חודש אלול, און קומט אויס היי יאר בעצם יום השבת קודש, איז באשטעטיגט געווארן אז אלע ברידער כ"ק האדמורי"ם לבית ראחמיסטריווקא שליט"א וועלן פראווענען א געהויבענע שבת יארצייט אינאיינעם בשבת אחים גם יחד.
דאס לעצטע מאל וואס די ברידער האדמורי"ם האבן געפראוועט שבת אינאיינעם, איז געווען דעם שבת בעמק הבכא, אינמיטן די ימי השבעה נאכן רבי'ן זצ"ל, ווען נישט אלע ברידער האבן שוין געהאט אנגענומען דעם כתר האדמורו"ת, אצינד וועט עס זיין דאס ערשטע מאל וואס אלע ברידער האדמורי"ם וועלן פראווענען א באחדות'דיגער שבת אינאיינעם, ווען זיבן רבי'ס וועלן אפרעכטן אינאיינעם די תפילות און טישן מיט די באטייליגונג פון טויזענטער חסידים.
די גאנצע שבת וועט געפראוועט ווערן בבית מדרשו של בעל ההילולא, ביהמ"ד הגדול ראחמיסטריווקא אויף די פינף און פערציגסטע סטריט אין בארא פארק, צווישן די הייליגע ווענט וואו דער רבי זצ"ל האט געפראוועט די עבודת הקודש פאר לאנגע יארן און משפיע געווען מזיו הודו והדרו אויף טויזענטער אידן איבער די גאנצע וועלט.
אין די יעצטיגע טעג, נאך וואס די ערשטע פלענער זענען באשטעטיגט געווארן ביי א פארזאמלונג דורך די ברידער האדמורי"ם שליט"א, האבן די עסקנים זיך אריינגעלאזט אין די העפטיגע צוגרייטונגען אהערצושטעלן אלע באדערפענישן פאר דעם גרויסן שבת, וואס רעכנט אריין אויסצושטעלן דעם בית המדרש מיט די מאקסימום פלעצער, פארזיכערן א באקוועמע און מכובד'יגע אכסניא פאר יעדע רבי, צושטעלן אש"ל מלא פאר די טויזענטער חסידים וואס וועלן קומען צו פארן פון איבעראל, און איינרישן סעודות שבת ביד רחבה פאר אלע געסט כראוי וכיאות.
