מטעם חצר הקודש סקולען איז באשטעטיגט געווארן אז צום ענדע פון די היי יעריגע זוממער סעזאן וועט כ"ק אדמו"ר מסקולען שליט"א זיך אריבערציען אין א מזל'דיגע שעה קיין בארא פארק, מקום שכיהנו בו אבותיו הקדושים צדיקי בית סקולען, וואו דער רבי שליט"א איז ווייטער ממשיך די שלשלת הקודש נאכן הסתלקות פון אביו הגדול כ"ק אדמו"ר מסקולען זצ"ל בעל ישועת יעקב.
דער רבי שליט"א וועלכער איז אן איידעם ביי זיין פעטער הגה"צ רבי שלמה אליעזר ברוינשטיין שליט"א אבד"ק טערניווא, האט נאך די חתונה זיך באזעצט אין מאנסי נעבן זיין שווער, דער רבי שליט"א איז באקאנט ביי תושבי מאנסי מיט זיין איידעלקייט און גדלות בתורה, און די לעצטע צען חדשים זינט דער רבי שליט"א איז אויפגענומען געווארן בכתר האדמורו"ת טוט דער רבי אריינפארן כסדר קיין בארא פארק צו משפיע זיין פאר די חסידים פונדערנאנט.
אצינד צום אנהייב פון די זוממער סעזאן איז געמאלדן געווארן דורך די הנהלת הקהלה די פלענער פאר די זוממער, ווען דער רבי וועט פראווענען אין בארא פארק די שבתים פון פרשת פנחס, דברים, און ראה, ווען שבת ראה ווערט אפגעצייכנט די שבת בעפאר די ערשטע הילולא קדישא פונעם רבי'ן זצ"ל.
תיכף נאכן זוממער, אין די טעג פון ראש חודש אלול הבעל"ט, וועט זיך דער רבי שליט"א ענדגילטיג אריבערציען וואוינען קיין בארא פארק אינאיינעם מיט די משפחה, אין א נייע דירה אויף די פינף און פופציגסטע סטריט, נישט ווייט פונעם תל תלפיות די נאסטאלגישע סקולענער בית המדרש. און זינט דאן וועט דער רבי שליט"א אפרעכטן די עבודת הקודש תמידין כסדרן מדי יום ביומו אינעם סקולענער בית המדרש, די תפילות יעדן טאג, און די טישן יעדן שבת ומדי מועד במועדו.
