תלמידי וחסידי סאטמאר זענען ווידער איינגעהילט אין הרגשים פון הרחבת גבולי הקדושה, ווען נעכטן דינסטאג איז געמאלדן געווארן די פרייליכע נייעס אז די הנהלה פון מוסדות סאטמאר אין לינדען איז אריין אין א פינף מיליאן דאללערדיגע קאנטראקט אפצוקויפן א ריזן גיגאנטישע געביידע פאר די מוסדות הקדושים, וואס געפונט זיך הארט נעבן די היימישע ישוב אין לינדען ניו דזשערזי.
די גיגאנטישע בנין וואס געפונט זיך אויף קאמערס דרייוו אין קרענפארד ניו דזשערזי, הארט נעבן די היימישע געגנט אין לינדען, איז א פולשטענדיגע אהערגעשטעלטע געביידע וואס קען גאנץ גרינג פארוואנדלט ווערן אין א היימישע מוסדות געביידע, וואו די טייערע תינוקות של בית רבן זאלן קענען עוסק זיין בתורה מיט הרחבת הדעת, און שטייגן דארט בדרך התורה והיראה אונטער די אויפזיכט פון די חשובע מחנכים און מרביצי תורה.
נעכטן דינסטאג איז כ"ק אדמו"ר מסאטמאר שליט"א געווען אויף א באזוך בקרב חסידיו אין לינדען, וואו עס איז פארגעקומען די מעמד יציקת הבורות פאר די נייע מקוה בבנין ביהמ"ד הגדול והחדש דקהל יטב לב ד'סאטמאר אין לינדען, און דערביי איז געמאלדן געווארן די פרייליכע בשורה אז די הנהלת המוסדות איז אריין אין קאנטראקט אפצוקויפן די געביידע וואס נעמט אריין דרייסיג טויזענט סקווער פיס, ארויסצוהעלפן די גאלאפירנדע וואוקס פון די מוסדות הקדושים.
