חסידי וויזניץ אין ניו יארק גרייטן זיך צו מקבל זיין את פני הקודש פון כ"ק אדמו"ר מוויזניץ שליט"א, וועלכער איז ערווארטעט אנצוקומען אויף א ספעציעלע באזוך קיין ניו יארק מחזק צו זיין די צעירי האברכים, די אינגעלייט ביז די פינף און דרייסיג יאר, וואס וועלן האבן די געלעגנהייט מיטצוהאלטן א פריוואטע שבת מיטן רבי'ן בצל הקודש.
דער רבי שליט"א וועלכער פארט ארויס היינט דאנערשטאג ממעון קדשו אין בני ברק קיין שווייץ, צו וויילן דארט אויף אפרוה דורכאויס די זוממער וואכן, איז ערווארטעט ארויסצוקומען קיין אמעריקע אנהייב וואך פרשת פנחס, און זיין צוגאסט אין די פאמאנע געגנט אין מאנסי ביז ענדע וואך פרשת מטות מסעי, וואו דער רבי וועט פראווענען די חסידים, די יונגע אינגעלייט וואס האבן חתונה געהאט אין די לעצטע פאר יאר.
אין שפיץ פון די געהויבענע באזוך וועט געפראוועט ווערן א ספעציעלע שבת מיט די אינגעלייט, אין די פראכטפולע מאריאט דעלטא האטעל אין ניו דזשערזי, וואס איז ספעציעל ארויסגעדינגען געווארן פאר דעם קומענדיגן שבת פרשת פנחס, דער רבי וועט פראווענען די תפילות און טישן אינאיינעם מיט די אינגעלייט ובני ביתם, און מרעיף זיין טללי תחיה בקירוב מקום.
פארגאנגענע וואך דינסטאג איז פארגעקומען א ספעציעלע מעמד כינוס ורוממתנו, וואו די חסידים האבן זיך צוזאמגענומען אין די בית ברכה זאל אין בארא פארק זיך צו דערווארעמען לקראת די געהויבענע באזוך פונעם רבי'ן, און מאכן די ריכטיגע הכנה מקבל צו זיין את פני הקודש.
