כלל ישראל בכל מקומות מושבותיהם זענען טיף צוטרייסלט און צושאקלט, נאך די שרעקליכע טעראר אטאקע וואס האט ליידער פאסירט היינט אינעם ווייטן אסטראליע, אין די צייט וואס הונדערטער אידישע קינדער האבן זיך פארזאמלט צו פראווענען דעם הייליגן יו"ט חנוכה און אנצינדן די הייליגע מנורה, און צוויי בארבארישע טעראריסטן האבן ליידער דורכגעפירט א מאסן שיסעריי אויפן ארט, אומברעגענדיג א צאל אידן און נאך צענדליגע וואס זענען פארוואונדעט געווארן.
די שרעקליכע פאסירונג האט פאסירט ביי א גרויסע חנוכה פארזאמלונג דורך די לאקאלע חב"ד קהילה אין באנדי ביעטש אין סידני אסטראליע, אנגעפירט דורכ'ן ארטיגן חב"ד שליח הרב אלי' שלאנגער הי"ד, אויף וועם מען זאגט שוין יעצט ל"ע זכרונו לברכה. די פארזאמלונג געצילט אריינצוברענגען א ליבשאפט צום הייליגן יו"ט חנוכה ביי די ארטיגע אידישע איינוואוינער, האט זיך אנגעהויבן שפעט נאכמיטאג מיט א רייע דרשות און פראגראמען, אין בעפארברייטונג צום מעמד הדלקת נר חנוכה וואס האט געזאלט פארקומען א שעה דערויף.
אינמיטן די מעמד אויף א גרויסע שטח אין באנדי ביעטש, האבן צוויי באוואפנטע טעראריסטן אנגעהויבן שיסן אויף די פארזאמלטע, איינער איז געשטאנען אויף א בריקל נישט ווייט און געשאסן פון דארט, און דער צווייטער איז אריינגעלאפן צווישן די פארזאמלטע און געשאסן אויף די ארומיגע. די מצב דארט איז געווען איום ונורא, פילע אידן זענען אראפגעפאלן מאכטלאז, אין די צייט וואס אנדערע האבן פרובירט צו אנטלויפן, א לאנגע צייט האט געדויערט ביז די פאליציי האט רעאגירט, ווען ביזדערווייל האט א ציווילער מוסלעמענער געשאסן און אומשעדליך געמאכט איינער פון די טעראריסטן.
נאך א שטיק צייט האט זיך די טרויעריג בילד אנגעהויבן אויסקלארן, ווען עס איז באשטעטיגט געווארן אז צוועלף זענען ליידער אומגעקומען רח"ל, אריינגערעכנט דער לאקאלער חב"ד שליח הרב אלי' שלאנגער הי"ד, וועלכער איז געשטאנען אין שפיץ פון די אידישע אקטיוויטעטן אין באנדי ביעטש פאר די לעצטע אכצן יאר, און האט עטליכע וואכן צוריק אריינגעברענגט א ניי געבוירן קינד לבריתו של אברהם אבינו.
א גרופע וואלאונטירן פון זק"א האבן זיך ארויסגעלאזט אויפן וועג קיין אסטראליע, צו העלפן די ארטיגע אויטאריטעטן מיט זייער עקספערטיז אין דעם געביט צו פארזיכערן די כבוד פון די אומגעקומענע, אויסער דעם איז פארהאן צענדליגע פארוואונדעטע, אריינגערעכנט א הצלה וואלאונטיר וואס איז געקומען העלפן די באטראפענע, אבער איז ליידער אליינס געשאסן געווארן ה"י.
די ארטיגע רעגירונג פארדאמט די טעראר אטאקע, און דער פרעמיער מיניסטער פון אסטראליע האט פארעפענטליכט א סטעיטמענט דערויף, קומענדיג שפעטער מיט נאך א סטעיטמענט אז די אטאקע האט פאסירט ביי א אידישע פארזאמלונג לכבוד חנוכה. אין די אידישע קהילה אין מעלבארן אסטראליע האט מען געפראוועט די ערשטע לעכטל חנוכה מיט תפילות ותחנונים צו מתפלל זיין פאר די פארוואונדעטע, און בעטן ביים אויבערשטן עס זאל הערשן רואיגקייט אויפן ארט אן קיין שנאת ישראל וואס איז ליידער אקטיוו.
אזוי אויך הערט מען פארשידענע סטעיטמענטס פון אנדערע לענדער און פאליטיקאנטן, וואס פארדאמען די שרעקליכע געשיכטע, מיטן האפענונג אז מען זאל שוין נאר הערן גוטע בשורות איינמאל פאר אלעמאל.
אבינו מלכנו נקום נקמת דם עבדיך השפוך.
