פילע חסידים ואנשי מעשה תושבי עיר ואם בישראל וויליאמסבורג, האבן אויפגענומען מיט גרויס פרייד די בשורה טובה וואס איז געמאלדן געווארן מטעם בית כ"ק אדמו"ר מטשערנאביל שליט"א, אז הנה מלכך בא, און דער רבי שליט"א וועט בעז"ה פראווענען א געהויבענע שבת אין שטאט וויליאמסבורג, בקרב חסידיו ומעריציו חסידים ואנשי מעשה.
דער רבי שליט"א וועלכער פירט אן דעם שיינעם הויף אינעם עיר התורה והחסידות בארא פארק, האט דאס לעצטע מאל געפראוועט א שבת אין וויליאמסבורג מיט גאנצע זיבעצן יאר צוריק בשנת תשס"ט, און שוין א לענגערע צייט וואס די חסידים ומעריצים תושבי וויליאמסבורג האבן פארבעטן דעם רבי'ן צו קומען פראווענען א שבת אין וויליאמסבורג צו משפיע זיין אויף די חסידים פונדערנאנט.
אצינד איז באשטעטיגט געווארן אז דער רבי שליט"א וועט בעז"ה זיין צוגאסט אין וויליאמסבורג דעם קומענדיגן שבת קודש פרשת שמות, בעוד שלשה שבועות, און פראווענען דעם גאנצן שבת אויף א גרויסן פארנעם אין די גרויסע עידן פאלאס זאל, וואס וועט ווערן אויסגערישט פאר די טויזענטער חסידים, מעריצים און תושבי העיר צו קענען מיטהאלטן דעם שבת בצילא דמהימנותא.
לויטן פלאן וועט דער רבי שליט"א וויילן אין שטאט עטליכע טעג ארום שבת, און באזוכן בבתי אדמורי"ם ורבנים תושבי העיר, און אזוי אויך באשיינען א רייע מסיבות און באנקעטן לטובת די קרן הבנין פון די נייע ביהמ"ד הגדול דחסידי טשערנאביל אין בארא פארק, וואס ווערט געבויעט די טעג אין פולן טעמפא.
