צום ערשטן מאל נאכן איבערנעמען די כתר האדמורו"ת מיט צוויי יאר צוריק, איז כ"ק אדמו"ר מביאלא שליט"א ערווארטעט ארויסצופארן אויף א לענגערע מסע הקודש קיין ניו יארק, אויפצוטרייבן גרויסע געלטער למען החזקת מוסדותיו הקדושים, די ישיבות הקדושות דחסידי ביאלא אין בני ברק און אלעד, און די פילצאליגע כוללים אין די בתי מדרשים דחסידי ביאלא לענגאויס ארץ ישראל.
דער רבי שליט"א וועט בעז"ה ארויספארן ממעון קדשו אין ירושלים קומענדיגן זונטאג פרשת שמות ט"ו טבת, און פארבלייבן אין ניו יארק אויף נאנט צו דריי וואכן אין א ציה. צוערשט וועט דער רבי וויילן אין לעיקוואד פאר צען טעג, דערנאך אין לאורענס פון דאנערשטאג פרשת וארא ביז זונטאג פרשת בא, און דאן וועט דער רבי שליט"א אנקומען קיין מאנסי און זיך דארט אויפהאלטן ביז דאנערשטאג פרשת בא, ווען דער רבי וועט זיך אומקערן אהיים למעון קדשו אין ארץ ישראל.
דורכאויס די געהויבענע באזוך וועלן פארקומען מערערע מסיבות און באנקעטן בבתי נגידים ושועים, וואס רופן זיך אן מיט גרויסע געלטער פאר די ביאלא מוסדות בארץ הקודש, אזוי אויך וועט דער רבי מחזק זיין תלמידים ומעריצים בהיכלי הישיבות והכוללים, און באזוכן ביי אדמורי"ם ורבנים מקבל צו זיין ברכות קדשם צום הנהגת העדה.
