ווי באריכטעט מיט עטליכע חדשים צוריק, איז באשטימט געווארן אז כ"ק אדמו"ר מצאנז שליט"א וועט אונטערנעמען א מסע הקודש קיין אמעריקע דעם ווינטער, נאך וואס עס איז געווען געפלאנט א געהויבענע נסיעה פונעם רבי'ן קיין אמעריקע פארלאפענעם חודש סיון, און איז געווארן אפגערופן צוליב די דעמאלטסדיגע מלחמה צווישן מדינת ישראל און איראן.
אצינד איז געמאלדן געווארן די גענויע פלענער פון די מסע הקודש מיטן נאמען "ותבנהו", וואס וועט פארקומען דורכאויס די וואכן פון פרשת בא און פרשת בשלח. די נאמען "ותבנהו" צייגט אויפן ציהל פונעם רבינ'ס יעצטיגע נסיעה, וואס איז צו מחזק זיין די קהילות און אויפבויען די קהילות און מוסדות פון חסידי צאנז אין אמעריקע.
דאס נעמט אריין א רייע פראיעקטן פון הרחבת גבולי הקדושה אינערהאלב קהילות ומוסדות צאנז אין אמעריקע, וואס בליהט און שיינט תחת דגלו והדרכתו פונעם רבי'ן שליט"א, ובהדרכת בנו הגה"צ רבי יוסף משה דוב האלבערשטאם שליט"א רב חסידי צאנז אין אמעריקע. דורכאויס די באזוך וועט דער רבי באשיינען עטליכע מעמדים בקרב הקהילות והמוסדות, און באשיינען רייכע מסיבות פאר נדיבים בעם.
צום הויכפונקט פון די ימי הביקור, וועט געפראוועט ווערן א היסטארישע שבת פרשת בשלח, וואס וועט זיין געאייגענט פאר די הונדערטער נדיבי לב נגידים ותומכים, וואס שליסן זיך אן מיט ריזיגע סכומים ארויסצוהעלפן די בליה און וואוקס פון די צאנזער קהילות אין אמעריקע, אריינגערעכנט די אנגייענדע בוי ארבעט אהערצושטעלן דעם נייעם ביהמ"ד אין מאנסי, די בוי פראיעקט צו פארברייטערן די גבולי הקדושה אין ביהמ"ד צאנז אין בארא פארק, און נאך א רייע אונטערנעמונגען להרחיב גבולי הקדושה.
דער רבי שליט"א וועט ארויספארן מוצאי שבת קודש פרשת וארא ערב ראש חודש שבט, און וויילן אין ניו יארק ביז מוצאי שבת קודש פרשת בשלח. די עסקנים ארבעטן אצינד אויס אלע איבריגע דעטאלן און די סדר הנסיעה, צו פארזיכערן אז דעם רבינ'ס באזוך ברענגט אויף די געוואונטשענע רעזולטאטן צו קענען ווייטער בויען די צאנזער אימפעריע אין אמעריקע.
נעכטן מאנטאג זאת חנוכה איז הגה"צ אבד"ק צאנז ארה"ב שליט"א אנגעקומען צוגאסט קיין ניו יארק, צו באשיינען א רייע אסיפות אין בעפארברייטונג צו די היסטארישע מסע הקודש, דער רב שליט"א וועט פראווענען דעם קומענדיגן שבת בקרב חסידי צאנז אין בארא פארק, און היינט דינסטאג קומט פאר א גרויסע אסיפה "הרחיבי" אין ביהמ"ד צאנז אין בארא פארק.
