אין די יעצטיגע טעג איז באשטעטיגט געווארן גרויסע פלענער בחצר הקודש ראחמיסטריווקא, אז בעז"ה וועט געפראוועט ווערן א גרויסארטיגע שבת התאחדות פאר כלל חסידי ראחמיסטריווקא, צום באנייאונג פון די הערליכע יונגל קעמפ "מחנה אהל יצחק ראחמיסטריווקא", וואס געפונט זיך אין גרינפיעלד פארק אין די קעטסקילס בערג.
די יונגל קעמפ איז געבויעט געווארן אין לויף פון די לעצטע דריי יאר, אנגעהויבן פון די ערשטע שטאפלען פון פלאנירונג און ארכיטעקטשור, זוממער תשפ"ד איז פארגעקומען די מעמד הנחת אבן הפינה, און צום לעצטן זוממער סעזאן תשפ"ה איז די קעמפ שוין באנייעט געווארן אינעם ערשטן שלב, אין די צייט וואס אין די יעצטיגע חדשים גייט אן העפטיגע בוי ארבעט צו פארענדיגן די צווייטע שלב, אלע בניני המחנה זאלן זיין גרייט צום אנהייב פון די בעפארשטייענדע זוממער סעזאן תשפ"ו.
זיך גרייטענדיג צום גרויסן חגיגת חנוכת הבנינים, איז אצינד באשטעטיגט געווארן די פלענער איבער א גרויסע שבת וואס וועט פארקומען צו פייערן דעם דערגרייכונג, די שבת חנוכת הבית וועט געפראוועט ווערן ברוב פאר והדר אין עטליכע חדשים, שבת קודש פרשת במדבר שבת בעפאר יו"ט שבועות, בתוככי המחנה אין גרינפיעלד פארק, וואס וועט פארוואנדלט ווערן אין א זעלטענע חסידישע אטמאספערע צום גרויסן שבת.
די עסקנים ארבעטן שוין העפטיג אויסצוארבעטן אלע דעטאלן, ווען מ'גרייט זיך צו אנטפאנגען הונדערטער חסידים פון אלע שטעט, וואס וועלן זיך קומען מיטפרייען מיט די געוואלדיגע דערגרייכונג פון הרחבת גבולי הקדושה, און מיטהאלטן דעם זעלטן פרייליכן שבת בצל הקודש פונעם נשיא המוסדות כ"ק אדמו"ר מראחמיסטריווקא שליט"א.
ווי פארשטענדליך וועט די דאזיגע שבת פארוואנדלט ווערן אלס א שבת התאחדות פאר ראחמיסטריווקא חסידים פון אומעטום, ווען מ'וועט זיך טרעפן אינאיינעם און איבערחזר'ן משנתו הטהורה פונעם אומפערגעסליכן רעיא מהימנא כ"ק אדמו"ר הרה"ק מראחמיסטריווקא זצ"ל, וועלכער האט גענוי אינעם זעלבן שבת פרשת במדבר, מיט גאנצע פיר און פערציג יאר צוריק, געפראוועט דעם ערשטן שבת אין בארא פארק, נאכן איבערנעמען די כתר האדמורו"ת.
