ווי באריכטעט מיט עטליכע חדשים צוריק, איז געלאזט געווארן אין גאנג א מאסיווע אונטערנעמונג דורך די חרדישע קהילות אין שטאט ציריך אין שווייץ, אהערצושטעלן א נייע מהודר'דיגע עירוב ארום די גאנצע אידישע געגנט אין ציריך, כדי צו פארגרינגערן און דערלייכטערן פאר די הונדערטער אידישע פאמיליעס וואס וואוינען דארט אין שטאט.
ביז היינט האבן אידישע קינדער אין ציריך נישט געקענט טראגן אויפן גאס שבת קודש, און די עסקנים האבן אריינגעלייגט גרויס הארעוואניע צו קענען אנקומען צו דעם מאמענט, אז א פולשטענדיגע מהודר'דיגע עירוב זאל ארומנעמען די גאנצע געגנט, צו קענען מטלטל זיין בהידור רב, און קינדער געבענטשטע משפחות זאלן קענען ארומגיין צו די עלטערן און שכנים דורכאויס די לאנגע שבת נאכמיטאג שעות.
די נייע עירוב איז געמאכט געווארן דורך א בשותפות'דיגע פראיעקט פון די צוויי הויפט קהילות אין שטאט, די חסידישע קהילה "אגודת אחים" אין שפיץ פונעם רב הגה"צ רבי צבי אלימלך פאדווא שליט"א, און די יעקישע קהילה "עדת ישורון" אין שפיץ פונעם רב הרה"ג ר' חיים משה לעווי שליט"א.
מיט א האלבע יאר צוריק זענען די רבני העיר ארויסגעקומען מיט א רוף צו די לאקאלע איינוואוינער, מיט א מעלדונג איבער די פרישע פלענער און א ביטע זיך אנצושליסן מיט די נויטיגע סכומים אלס שותפים אין דעם שטאטישן פראיעקט, אצינד ווערט געמאלדן די גאר פרייליכע בשורה אז צום קומענדיגן שבת קודש פרשת ויגש וועט מען שוין קענען טראגן אויפן גאס, ווען די הכשר אויפן עירוב גייט אריין אין קראפט.
אין לויף פון די לעצטע פאר וואכן זענען די רבני העיר פערזענליך ארויס אויף די גאסן צו באטראכטן די נייע עירוב, און איבערגעבן די לעצטע הוראות וואס זענען נוגע, אזוי אויך האט מען אפגעקויפט רעכטן פון די שטאטישע באאמטע צו קענען שטעלן אייגענע פלעצער און מחיצות, ווי עס פאדערט זיך לויט די הלכה.
מארגן ערב שבת קודש וועט פארקומען די מעמד זיכוי הפת אין שטוב פונעם מרא דאתרא הגה"צ ר' צבי אלימלך פאדווא שליט"א גאב"ד אגודת אחים, וועלכער האט אין די יעצטיגע טעג אפגעשריבן א ספעציעלע בריוו פאר די חברי הקהילה צו מעלדן איבער די פרייליכע אנטוויקלונג, און אז מען האט אוועקגעשטעלט אחריות'דיגע משגיחים צו באקוקן דעם עירוב מדי שבת בשבתו. אזוי אויך ברענגט דער רב ארויס פארשידענע וויכטיגע הלכות וואס זענען נוגע ווען מ'טראגט מיט א עירוב, און פארשידענע זאכן וואס מען טאר נישט טראגן אפילו מיט א עירוב צוליב אנדערע איסורים.
