תושבי קרית יואל באגריסן מיט פרייד די הרחבת גבולי הקדושה אין די נייע בליענדע געגנט "שכונת ויואל משה", ווען אויף דעם שבת פרשת ויגש ווערט געעפנט אין א מזל'דיגע שעה די נייע ביהמ"ד "ישראל שלום", וואס איז ערווארטעט צוצוברענגען א געוואלדיגע הרחבת הדעת צו לערנען און דאווענען פאר אלע תושבי השכונה.
שכונת ויואל משה איז אויסגעשטיגן אלס א שטארקע צענטער אין די לעצטע פאר יאר, זינט די ערשטע משפחות האבן אריינגעמופט דארט, און יעדע פאר חדשים וואקסט עס מיט נאך משפחות ווען נאך געביידעס ווערן פארענדיגט מיט פראכט. אויסער די עקזיסטירנדע ביהמ"ד בית אלעזר, איז אויפגעבויעט געווארן א נייע הערליכע בית המדרש "ישראל שלום" צו דעקן די געברויך פון די הונדערטער תושבי השכונה.
די נייע ביהמ"ד איז אצינד גרייט געווארן גאר שיין, א גרויסע לופטיגע היכל און עטליכע דאווענען שטיבלעך, א גרויסע פראכטפולע מקוה מיט אלע אנדערע באדערפענישן, וואס פעלט זיך אויס פאר א ריכטיגע צענטער לתורה ולתפילה.
דעם שבת קודש פרשת ויגש וועט צום ערשטן מאל פארקומען אין די נייע ביהמ"ד די תפילות שבת תמידין כסדרן, און מוצאי שבת וועט געפראוועט ווערן א גרויסע חנוכת הבית און קביעת מזוזה, אין שפיץ פון כ"ק אדמו"ר מסאטמאר שליט"א.
