תלמידי וחסידי אמונת ישראל אין ארץ הקודש גרייטן זיך בהדרת כבוד צו מקבל פנים זיין כבוד הגה"צ רבי שמואל יהודה זילבער שליט"א אבד"ק אמונת ישראל, וועלכער איז ערווארטעט אויף א געהויבענע באזוך אין ארץ ישראל צו באשיינען די מעמד חנוכת הבית פון די נייע ביהמ"ד אמונת ישראל אין שטאט ביתר, נאך העפטיגע בוי ארבעט פון עטליכע יאר לשם ולתפארת.
די פונדאמענטן פון די נייע בית המדרש אויף רחוב חב"ד אין ביתר, איז געגאסן געווארן נאך בחיים חיותו פונעם אומפארגעסליכן מנהיג דער משגיח הגה"צ רבי משה וואלפסאן זצ"ל, וועלכער האט באשיינט די מעמד הנחת אבן הפינה און דערביי אויפגעטרעטן מיט דברות קודש. אצינד ווען מען האלט שוין אין א מזל'דיגע שעה ביים גמר הבנין, גרייט מען זיך אויף די גרויסע חגיגה חנוכת הבית וואס וועט פארקומען אין שפיץ פונעם רב שליט"א.
דעם דאנערשטאג אינדערפרי פרשת ויחי וועט דער רב שליט"א לאנדן בשערי ארץ הקודש, און דאנערשטאג נאכט וועט געפייערט ווערן די מעמד חנוכת הבית אין ביתר ברוב עם הדרת מלך, אין די נייע היכל ביהמ"ד אויף רחוב חב"ד אין שטאט. דער רב שליט"א וועט פארבלייבן אין שטאט אויף שבת קודש, און פראווענען א געהויבענע שבת מיט די חברי הקהילה פון ביתר.
לויטן פלאן וועט דער רב שליט"א פארבלייבן אין ארץ ישראל פאר נאך א וואך, און פראווענען דעם שבת קודש פרשת שמות בעיר הקודש ירושלים, אינעם גרויסן היכל פון ביהמ"ד סלאנים אויף רחוב דורש טוב.
