שטייענדיג גאנצע פופציג יאר זינט די התייסדות הקהילה, איז פארלאפענעם מוצאי שבת קודש פארגעקומען א גייסטרייכע מעמד "יובל החמשים" בחצר הקודש בורשטין, ווען די חברי הקהילה האבן זיך צוזאמגענומען אפצוצייכענען דעם שטארקן דערגרייכונג, און צולייגן א פלייצע פאר די המשך אויף ווייטער.
כ"ק אדמו"ר מבורשטין שליט"א וועלכער איז ליידער נתייתם געווארן פון זיין פאטער כ"ק אדמו"ר רבי שלמה יעקב זיידא מבורשטין פאדהייץ זצ"ל אין זיינע יונגע יארן, האט געגרינדעט דעם בית המדרש אין יאר תשל"ו לזכר נשמת אבותיו הקדושים, דורכאויס די יארן האט זיך די קהילה פארשפרייט מער און מער ביזן היינטיגן טאג בליעה"ר.
די מעמד איז פארגעקומען אין זאל פון עטרת גאלדא, וואו עס האבן זיך באטייליגט א שיינע צאל אדמורי"ם ורבנים פון שטאט, צוערשט איז געהערט געווארן א מוזיקאלישע איבערזיכט אויף די קהילה קדושה דורך הרב החסיד ר' ישראל שפירא הי"ו, און דערנאך איז געהערט געווארן א שמועס איבער די געהויבענע נוסח פונעם רבי'ן שליט"א.
דאן איז אפגעהאלטן געווארן א ספעציעלע פאנעל מיט דריי חשובע חברי הקהילה, דער ראש הקהל הרב החסיד ר' חיים ברוך גאטהערער הי"ו, הרב החסיד ר' יעקב לייב ראטטענשטיין הי"ו און הרב החסיד ר' וואלף ברוינער הי"ו פון די נאנטע תלמידים ביים בורשטינער רבי'ן שליט"א. און צום הויכפונקט האט מען געהערט דברות קודש פונעם רבי'ן שליט"א.
