שמחת בית באבוב – ספינקא: עס איז געשלאסן געווארן די שידוך פון א אייניקל ביי כ"ק אדמו"ר מבאבוב שליט"א, די כלה א טאכטער פון בנו הגדול הגה"צ ר' חיים שלום האלבערשטאם שליט"א, איידעם ביי הגה"צ גאב"ד סאטמאר ב"פ שליט"א, מיט די חתן א זון פון הגה"צ ר' אשר אנשיל מנחם זעלטענרייך שליט"א, זון פון הגה"צ אבד"ק טשאקאווא קערעסטיר שליט"א, און איידעם ביי כ"ק אדמו"ר מספינקא שליט"א.
שמחת בית פשעווארסק – מעליץ: היינט קומט פאר די שמחת החתונה פון א אייניקל ביי כ"ק אדמו"ר ממעליץ שליט"א, די חתן א זון פון זיין זון הגה"צ ר' שמואל צבי מאסקאוויטש שליט"א, איידעם ביי כ"ק אדמו"ר מראדאשיץ זצ"ל, מיט די כלה א אור אייניקל ביי כ"ק אדמו"ר מפשעווארסק שליט"א, אייניקל פון זיין עלטסטן איידעם הגה"צ ר' משה שמואל ראטטענבערג שליט"א אבד"ק קאסאני וויליאמסבורג, א טאכטער פון זיין זון הגה"צ ר' אלטר יצחק ראטטענבערג שליט"א, איידעם ביי הגה"צ ר' יעקב מרדכי טווערסקי שליט"א אבד"ק טשערנאביל אלעד. – די שמחת החתונה קומט פאר אין זאל היכלי מלכות אין בני ברק.
שמחת בית מישקאלץ – קוזמיר: עס איז געשלאסן געווארן די שידוך פון א אייניקל ביי כ"ק אדמו"ר ממישקאלץ ארה"ק שליט"א, די חתן א זון פון זיין איידעם הגה"צ ר' יחיאל זונענבאנד שליט"א, זון פון הגה"צ ר' דוב זונענבאנד שליט"א רב חסידי אלכסנדר, איידעם ביי כ"ק אדמו"ר מאלכסנדר זצ"ל בעל אמרי מנחם, מיט די כלה א טאכטער פון הגה"צ ר' יקותיאל יהודה גרינוואלד שליט"א, איידעם ביי כ"ק אדמו"ר מקוזמיר שליט"א.
היינט קומט פאר א ספעציעלע כינוס פאר חסידי וויזניץ חבורת "המתנזרים" וואס זענען גענצליך אפגעשיידט פון טעכנעלאגיע, עס קומט פאר אין זאל בית וויזניץ אין קרית וויזניץ בני ברק, אין שפיץ פון כ"ק אדמו"ר מוויזניץ שליט"א.
היינט נאכט ה' שבט געפאלט די יומא דהילולא קדישא פון הרה"ק בעל שפת אמת מגור זי"ע, נכדו כ"ק אדמו"ר מגור שליט"א וועט אריינקומען אויף תפילת מעריב לכבוד די יארצייט, אין ביהמ"ד הגדול גור אין ירושלים.
היינט ד' שבט געפאלט די יומא דהילולא קדישא פון כ"ק אדמו"ר מקאלוב זצ"ל בעל חקל תפוחין, בנו ממלא מקומו כ"ק אדמו"ר מקאלוב שליט"א לרפו"ש וועט פוקד זיין דעם ציון הק' היינט פארמיטאג, אויפן וואשינגטאן בית החיים אין ניו דזשערזי.
כ"ק אדמו"ר מספינקא רמת אהרן שליט"א וועט היינט אויפדערנאכט אפרעכטן די יארצייט טיש לרגל די הילולא קדישא פון זיין פאטער הרה"צ רבי יצחק אייזיק ווייס מספינקא זצ"ל, און לרגל די יום ההצלה פונעם רבי'ן שליט"א ביי די שרעקליכע עקסידענט נאך די לוויה פונעם באבא סאלי זי"ע, די מעמד קומט פאר אין זאל עטרת מרים אויף רחוב סורוצקין אין בני ברק.
כ"ק אדמו"ר מצאנז שליט"א וועלכער איז צוגאסט די טעג אין ניו יארק אין ראם פון די מסע הקודש "ותבנהו", וועט היינט נאכמיטאג אנקומען בהיכל ישיבתו שפע חיים צאנז אין מאנסי, אויף תפילת מנחה און קריאת ויחל לרגל די ימי השובבי"ם.
כ"ק אדמו"ר מלעלוב שליט"א וועלכער האט זיך אויפגעהאלטן די לעצטע וואך צייט אין שטאט ליזענסק אין פוילין, וועט היינט אנקומען צום שטאט לעלוב אינאיינעם מיט הונדערטער חסידים, לקראת די יומא דהילולא קדישא פון הרה"ק רבי דוד'ל לעלובער זי"ע וואס געפאלט דעם זונטאג ז' שבט, היינט נאכט וועט פארקומען די מעמד קביעת מזוזה פאר די נייע צימערן אינעם בנין הכנסת אורחים אין שטאט לעלוב.
כ"ק אדמו"ר מביאלא שליט"א וועלכער האט זיך אויפגעהאלטן די לעצטע דריי וואכן אין ניו יארק לטובת מוסדותיו הקדושים, וועט היינט ארויספארן אויפן וועג קיין שווייץ, וואו דער רבי וועט זיך אויפהאלטן די קומענדיגע וואך צו מפקח זיין בעניני כשרות.
כ"ק אדמו"ר מוויזניץ שליט"א פון בית שמש וועט היינט ארויספארן קיין אתרא קדישא מירון בראש קהל חסידיו, אויף א תפילת רבים לקראת די שמחת החתונה פון א אייניקל וואס קומט פאר די קומענדיגע וואך.
כ"ק אדמו"ר ממשכנות הרועים שליט"א קומט היינט אן צוגאסט קיין ניו יארק, צו באשיינען די שמחת החתונה פון א אייניקל וואס קומט פאר די קומענדיגע וואך.
כ"ק אדמו"ר מבישטינא שליט"א לאזט זיך היינט ארויס אויף א לענגערע נסיעה פ ון צוויי וואכן קיין ניו יארק, אויפצוטרייבן געלטער לטובת די קרן הבנין פון די נייע ביהמ"ד דחסידי בישטינא אין פתח תקוה.
אריינצושיקן מודעות און נייעס, שיקט אן אימעיל צו NEWS@JDNMAIL.COM
