הונדערטער לעלובער חסידים לאזן זיך ארויס אין די יעצטיגע טעג על אם הדרך, צו מיטהאלטן א געהויבענע שבת אינעם עיר האבות לעלוב אין פוילין, ווען כ"ק אדמו"ר מלעלוב שליט"א וועט פראווענען דעם שבת קודש סמוך ונראה צום ציון הק' פון זקינו הרה"ק רבי דוד'ל לעלובער זי"ע, לרגל די הילולא קדישא וואס געפאלט קומענדיגן זונטאג ז' שבט.
יאר יערליך קומט דער רבי שליט"א אן קיין לעלוב אינאיינעם מיט פילע חסידים, צו פוקד זיין דעם ציון הק' בעצם יומא דהילולא קדישא, דאס יאר ווען די הילולא קדישא געפאלט מוצאי שבת קודש, האט דער רבי שליט"א אויסגעדרוקט רצון קדשו צו פראווענען דעם שבת הילולא קדישא באתרא דמר, אין א גיגאנטישע שאטער וואס ווערט אויפגעשטעלט דורך הכנסת אורחים אין לעלוב.
דער רבי שליט"א איז שוין ארויסגעפארן קיין פוילין פארגאנגענע וואך, און האט זיך אויפגעהאלטן די לעצטע וואך צייט אין שטאט ליזענסק, סמוך ונראה צום ציון הק' פונעם הייליגן רבי'ן ר' אלימלך זי"ע, מארגן דאנערשטאג וועט דער רבי אנקומען קיין לעלוב, וואו אין די אווענט שעה'ן וועט פארקומען די מעמד קביעת מזוזה פאר די נייע צימערן אין די בנין הכנסת אורחים.
שבת קודש וועט געפראוועט ווערן במקהלות פילע חסידים ואנשי מעשה, נאכגעפאלגט מיט די יומא דהילולא קדישא, וואס נעמט אריין די עלי' לציון הק' בהתעוררות רב, די מעמד ההדלקה ווי איינגעפירט שוין לאנגע יארן, און שפעטער די לוסטיגע יארצייט טיש וואס פארציהט זיך פאר לאנגע שעות מיט געגועים און כיסופים, הייליגע מאמענטן וואס איז באקאנט ביי די חסידים אלס א זמן מסוגל פאר ישועות.
